ბათუმის, ერთ-ერთ რესტორანში 100-მდე მოწამლული ადამიანის ლაბორატორიული კვლევისას სალმონელოზის ბაქტერია აღმოჩნდა.

აჭარის საზოგადოებრივი ჯანდაცვის ცენტრის განმარტებით, რამდენიმე დღეში გახდება ცნობილი, რა გახდა კვების ობიექტში ადამიანების მოწამვლის მიზეზი.

სურსათის ეროვნულ სააგენტოში აცხადებენ, რომ შეტყობინების მიღებისთანავე შესაბამისი ჯგუფი ადგილზე მივიდა, თუმცა ნიმუშების აღება საკვების არ არსებობის გამო ვერ მოხერხდა.

სარიტუალო დარბაზ “კახაბერში” განმარტავენ, რომ მათთან შესაბამისი უწყებებიდან შემოწმების მიზნით არავინ მისულა.

ძლიერი ინტოქსიკაცია სულ ასამდე ადამიანმა მიიღო, მათ შორის არიან არასრულწლოვნებიც. ყველა დაზარალებული საქორწინო წვეულების სტუმარი იყო.

მათი ნაწილი ამ დრომდე საავადმყოფოებში რჩება.  ინტოქსიკაციის მიზეზად ტკბილეული სახელდება, რომლის შენახვის პირობებიც არ იყო დაცული. აჭარის საზოგადოებრივი ჯანდაცვის ცენტრის დირექტორის ნინო ნიჟარაძის თქმით, შემთხვევა უკავშირდება კრემიანი ნამცხვრის მიღებას, თუმცა ამის დამტკიცება ვერ ხერხდება, რადგან სურსათის აროვნული სააგენტოს მიერ, მათი უფლებამოსილების გამო ვერ ჩატარდა საკვების პროდიქტის ლაბორატორიული ანალიზი.

"რაც შეეხება პაციენტების ლაბორატორიულ კვლევას, ამოითესა სალმონელა, სალმონელოზის ბაქტერიული დაავადება ,რომელიც შეიძლება რძის პროდუქტებით, კრემიანი ნამცხვრით, კვერცხით გავრცელდეს, თუ აღნიშნული პროდუქტების შენახვის ტემპერატურული რეჟიმი დაირღვა“- აცხადებს აჭარის საზოგადოებრივი ჯანდაცვის ცენტრის დირექტორი ნინო ნიჟარაძე.