იუსტიციის მინისტრი თეა წულუკიანი აცხადებს, რომ შესაძლოა, მთავარი პროკურორის არჩევისას კენჭისყრაში მონაწილეობა არ მიიღოს. მისი განმარტებით, ამის მიზეზია,  „საზოგადოებამ დაინახოს, რა სურს საპროკურორო საბჭოს“.

თეა წულუკიანმა მთავარი პროკურორობის ერთ-ერთ კანდიდატიზე შალვა თადუმაძესთან ნათესაურ კავშირზეც ისაუბრა. 

„არის თუ არა ჩემი ნათესავი შალვა თადუმაძე? გეტყვით, რომ ის არ არის ჩემი ნათესავი. მე ვარ მისი შვილის ნათლია. ის გავიცანი პოლიტიკურ ბრძოლაში 2012 წელს, როდესაც ბატონი ბიძინა ივანიშვილის გარშემო ვიყავით იურისტების ჯგუფი შემოკრებილი, რომელებმაც „ქართულ ოცნებასთან“ ერთად ვიბრძოლეთ და დავამარცხეთ „ნაციონალური მოძრაობა“ პირველ ოქტომბერს. ამ ჯგუფში იყო არჩილ კბილაშვილი, შალვა თადუმაძე, თქვენი მონამორჩილი, ბატონი ზაქრო ქუცნაშვილი, ალექსანდრე ბარამიძე, მაგრამ ეს იყო შთამბეჭდავი ჯგუფი იურისტებისა და ასე შედგა ჩვენი ნაცნობობა ბატონ შალვასთან. რაც შეეხება საბჭოს, ყველა კანდიდატთან მაქვს კითხვები. თუმცა ვფიქრობ, რომ საბჭოს სხდომაზე მაქსიმალურად თავს შევიკავებ კითხვების დასმისგან, მათ შორის ერთ-ერთ კანდიდატთან მაქვს ძალიან დიდი კითხვა. ამ კითხვას არ დავსვამ და შეიძლება კენჭისყრაშიც არ მივიღო მონაწილეობა იმისთვის, რომ საზოგადოებამ დაინახოს საბჭოს რა სურს“,- განაცხადა წულუკიანმა და აღნიშნა, რომ სხდომა მიმდინარე კვირაში ჩატარდება. 

საპროკურორო საბჭოს იუსტიციის მინისტრის მოვალეობის შემსრულებელმა მთავარი პროკურორობის სამი კანდიდატი წარადგინა – შალვა თადუმაძე, შალვა შავგულიძე და ნინო გოგნიაშვილი.