ხორბლის ავტოტრანსპორტით გადამზიდავთა საპროტესტო აქციის მონაწილე თვითმკვლელობით იმუქრება.  მძღოლი სატვირთო ავტომანქანის სახურავზე ავიდა, ბენზინი გადაისხა და თავის დაწვას აპირებს. კიდევ ერთმა იმპორტიორმა მძღოლმა სავარაუდოდ, ხელზე ვენა გადაიჭრა.

მამაკაცი ამბობს, რომ  არ გაჩერდება, ვიდრე ფინანსთა მინისტრი ადგილზე არ გამოცხადდება. მამაკაცი აქციის დანარჩენ მონაწილეებსაც მოუწოდებს არ წავიდნენ სამინისტროში შეხვედრაზე და მოითხოვონ მინისტრის მათთან მისვლა, წინააღმდეგ შემთხვევაში ის თავის დაწვით იმუქრება. ლილოს ტერმინალში იმყოფებიან სამართალდამცველებიც.

გადამზიდავები უკვე რამდენიმე დღეა შემოსავლების სამსახურის ეკონომიკური გაფორმების ზონაში მართავენ საპროტესტო აქციას და მოითხოვენ გაუქმდეს ფინანსთა მინისტრის ბრძანება, რომლის თანახმად, საქართველოს საბაჟო ტერიტორიაზე ხორბლის და ფქვილის შემოტანა და გატანა შესაძლებელია მხოლოდ სარკინიგზო და საზღვაო ტრანსპორტით და ცალკეულ შემთხვევებში, შემოსავლების სამსახურის თანხმობით, ავტოსატრანსპორტო საშუალებებითაც.