"ნაციონალური მოძრაობა" თავმჯდომარის გარეშე გაარძელებს ფუნქციონირებას, - ამის შესახებ პარტიის პოლიტსაბჭოს დღევანდელი სხდომის შემდეგ გახდა ცნობილი.

მას შემდეგ, რაც მიხეილ სააკაშვილს საქართველოს მოქალაქეობა შეუწყდა, ის პარტიის თავმჯდომარის პოსტიდან ავტომატურად გათავისუფლდა, რადგან, საქართველოს კანონმდებლობით, უცხო ქვეყნის მოქალაქეს პოლიტიკაში მონაწილეობის უფლება არა აქვს. დღევანდელ პოლიტსაბჭოს სხდომაზე კი გადაწყდა, რომ ახალი პარტიის თავმჯდომარის არჩევა არ მოხდება. 

"როგორც პარტია და როგორც პოლიტიკოსები, ვემორჩილებით კანონს, ვემორჩილებით მიღებულ გადაწყვეტილებებს. შესაბამისად, მიხეილ სააკაშვილი აღარ გახლავთ პარტიის თავმჯდომარე. უკვე სამი წელია, პარტია გუნდურ მმართველობაზე არის გადასული. არსებობს პოლიტიკური საბჭო, მისი თავმჯდომარე და გენერალური მდივანი და პარტიაში გადაწყვეტილებებს ეს სტრუქტურები იღებენ. ახალი თავმჯდომარის არჩევა მნიშვნელოვანი არ არის," - განაცხადა დავით ბაქრაძემ.