ირაკლი ღარიბაშვილი პრეზიდენტს და პარლამენტს სთხოვს, პატრიარქისთვის შეწყალების უფლების მისანიჭებლად მუშაობა დაიწყონ. 

ღარიბაშვილის კომენტარი მთავრობის ადმინისტრაციის პრესსამსახურმა მას შემდეგ გაავრცელა, რაც ამ თხოვნით პრემიერ-მინისტრს თავად პატრიარქმა საჯაროდ მიმართა და თქვა, რომ მას ამ საკითხზე პრემიერთან უკვე ჰქონდა საუბარი.  

"სრულიად საქართველოს კათოლიკოს-პატრიარქი, უწმინდესი და უნეტარესი ილია მეორე ქართველი ერის სულიერი წინამძღვარია და მისი რჩევა ყველა ადამიანისთვის მნიშვნელოვანი და ღირებულია... საქართველოს პრემიერ-მინისტრი მიიჩნევს, რომ მსჯავრდებულთა შეწყალების პროცესში პატრიარქის ჩართულობის გაზრდას პოზიტიური როლის შესრულება შეუძლია. შესაბამისად, უწმინდესის თხოვნის საფუძველზე, მთავრობის მეთაური საქართველოს პრეზიდენტს და პარლამენტს აღნიშნულ საკითხზე მსჯელობის დაწყების თხოვნით მიმართავს," - ნათქვამია მთავრობის ადმინისტრაციის პრესსამსახურის მიერ გავრცელებულ ინფორმაციაში.

ილია მეორე შეწყალების უფლებას ითხოვს, რაც კონსტიტუციით მხოლოდ პრეზიდენტს აქვს მინიჭებული.