ადამიანი, რომელიც აშკარაა, ფიზიკური განადგურების შიშით მზად არის, რომ ენით აღუწერელ ტყუილებზე ისაუბროს, ისტორიები მოიგონოს, რომელიც, ვფიქრობ, დამაჯერებელი არავისთვის არის, - ამის შესახებ „ნაციონალური მოძრაობის“ წევრმა სალომე სამადაშვილმა სპორტის ყოფილი მინისტრის ლევან ყიფიანმა გუშინდელი განცხადებებთან დაკავშირებით აღნიშნა.

მისი თქმით, ამ განცხადების შემდეგ ერთი რამ ნათელია, რომ არანაირი გამოძიების პროცესის მიმართ არ შეიძლება ვინმეს რაიმე სახის ნდობა ჰქონდეს. 

„ყველა ჩვენგანისთვის ძალიან მტკივნეული სანახაობა იყო ასეთი დამცირებული ადამიანის ყურება. ამ განცხადების შემდეგ ერთი რამ ნათელია, რომ არანაირი გამოძიების პროცესის მიმართ არ შეიძლება ვინმეს რაიმე სახის ნდობა ჰქონდეს. სწორედ ის განცხადებები, რაც ბოლო დღეებში კეთდება, მათ შორის არასამთავრობო ორგანიზაციების მხრიდან ძალიან ზუსტ შეფასებას აძლევს იმას, თუ ქვეყანაში რა ვითარებაა შექმნილი სახელმწიფო ინსტიტუტების ჩამოშლის თვალსაზრისით. ჩვენ დღეს რეალურად ვცხოვრობთ ქვეყანაში, სადაც არ შეიძლება, რაიმე სახის ნდობა გვქონდეს სახელმწიფოს მიმართ, რომელიც კოორდინირებულად მუშაობს, როგორც კრიმინალური სინდიკატი საკუთარი კორუმპირებული ინტერესების დასაცავად“, – განაცხადა სალომე სამადაშვილმა, რომელმაც აქვე აღნიშნა, რომ ლევან ყიფიანი გუშინ სასოწარკვეთილი ადამიანის შთაბეჭდილებას ტოვებდა.

მისივე თქმით, ძალიან სამწუხაროა, რომ ჩვენ ვცხოვრობთ სახელმწიფოში, სადაც ადამიანების, მათ შორის ყოფილი სახელმწიფო პირებისა და ყოფილი მინისტრების ასეთ მდგომარეობამდე მიყვანა შეიძლება. მაგრამ მისივე განცხადბეით, ეს ის რეალობაა, რომელიც ჩვენ ქვეყანაში გვაქვს.

ცნობისთვის, ლევან ყიფიანი საქალაქო სასამართლოში „ომეგა ჯგუფთან“ დაკავშირებით გავრცელებული ფარული ჩანაწერების გამოძიების საქმეზე გამოიკითხა. როგორც მან განაცხადა, ზაზა ოქუაშვილის მიერ ორგანიზებულ სპექტაკლში მიიღო მონაწილეობა, რომელიც ოქუაშვილს უცხოელ პარტნიორებთან ურთიერთობის მოსაგვარებლად სჭირდებოდა.