„საქართველოს ეროვნული ერთობის“ ლიდერს გიორგი ჭელიძეს სასამართლოში 13 ადვოკატი იცავს. ის სამართალდამცავებმა იარაღისა და საბრძოლო მასალის უკანონო შეძენა-შენახვის ბრალდებით დააკავეს.

თბილისის საქალაქო სასამართლოში ჭელიძის საქმეზე წინასასამართლო სხდომა მიმდინარეობს. 

ამ ეტაპზე მხარეები პროკურორების აცილების შუამდგომლობას განიხილავენ.

პროკურორების აცილების შუამდგომლობა თავად ჭელიძემ დააყენა და განმარტა, რომ პროკურორები მას კომუნიკაციის უფლებას უკანონოდ უზღუდავენ. ჭელიძემ აღნიშნა, რომ პატიმრობაში ყოფნიდან 21 დღის შემდეგ, მას სურდა დედასთან სატელეფონო ზარის განხორციელება, რის უფლებასაც მას კანონი აძლევდა, თუმცა პროკურორების მოთხოვნიდან გამომდინარე, მას ზარის განხორციელების უფლება შეეზღუდა.

გიორგი ჭელიძე 31 აგვისტოს დააკავეს. დანაშაული, რომლის ჩადენასაც მას ედავებიან, 2-დან 5 წლამდე თავისუფლების აღკვეთას ითვალისწინებს.