"ქართული ოცნების" თავმჯდომარეს, ბიძინა ივანიშვილს კითხვებს რუსთავი 2-დან ეკა კვესიტაძე, ტვ პირველიდან დიანა ტრაპაიძე, ხოლო იმედიდან ირაკლი ჩიხლაძე დაუსვამს.

ინტერვიუ დღეს, 23 ოქტომბერს, 22:00 საათზე დაიწყება.

ბიძინა ივანიშვილმა ინტერვიუზე გიორგი გაბუნია, ინგა გრიგოლია და ირაკლი ჩიხლაძე მიიწვია, თუმცა გრიგოლიამ და გაბუნიამ მათი გადაცემის გამო, ინტერვიუში მონაწილეობაზე უარი განაცხადეს. ინტერვიუს მხოლოდ ირაკლი ჩიხლაძე დათანხმდა.

ინფორმაცია ინტერვიუზე მიწვევასთან დაკავშირებით გუშინ "ქართული ოცნების" პრესსამსახურმა გაავრცელა.

"23 ოქტომბერს, 22.00 საათზე, პოლიტიკური გაერთიანება „ქართული ოცნება - დემოკრატიული საქართველოს“ პარტიის თავმჯდომარე ბიძინა ივანიშვილი სამი ყველაზე რეიტინგული არხის, სამშაბათის მთავარი პოლიტიკური თოქ-შოუების წამყვანებს: ტელეკომპანია იმედიდან, „პირისპირ“ - ირაკლი ჩიხლაძეს, ტელეკომპანია რუსთავი 2-დან „არჩევანი“ - გიორგი გაბუნიას და ტვ პირველიდან - „რეაქცია“ - ინგა გრიგოლიას, იწვევს მასთან ინტერვიუზე.

იმ გარემოების გათვალისწინებით, რომ პარტიის თავმჯდომარემ პოლიტიკაში დაბრუნებისთანავე ვრცელი ინტერვიუ მისცა საზოგადოებრივ მაუწყებელს, ამჯერად მხოლოდ აღნიშნული თოქ-შოუების წამყვანების შეკითხვებს უპასუხებს.

ბიძინა ივანიშვილი მედიასთან შეხვედრებს სხვადასხვა ფორმატში მომავალშიც გეგმავს.

ინტერვიუს საერთო სიგნალს პარტია „ქართული ოცნება - დემოკრატიული საქართველო“ პირდაპირ რეჟიმში ყველა დაინტერსებულ მედიასაშუალებას მიაწვდის", - ნათქვამია გავრცელებულ ინფორმაციაში.