აშშ-ის სამხედრო-საჰაერო ძალების რადიოელექტრონული სადაზვერვო თვითმფრინავი Boeing RC-135V საბერძნეთის კუნძულ კრეტაზე განთავსებული სუდა ბეის ავიაბაზიდან აფრინდა და შავი ზღვის აკვატორიისკენ გაფრინდა. ამის შესახებ უკრაინული პორტალი mil.in.ua იუწყება.

პორტალის ცნობით, კიევის დროით 8:30 საათისთვის, თვითმფრინავი ბულგარეთის საჰაერო სივრცეში იმყოფება და ყირიმის სანაპიროსკენ მიემართება.

შეგახსენებთ, 25 ნოემბერს, რუსეთის მხრიდან უკრაინული გემების მიმართ თავდასხმა განხორციელდა.რუსი სამხედროების თავდასხმის შედეგად დაიჭრა 6 უკრაინელი. ყირიმის ავტონომიურ რესპუბლიკაში უკრაინის პრეზიდენტის წარმომადგენელის, ბორის ბაბინის განაცხადებით, რუს მესაზღვრეებს 20-ზე მეტი უკრაინელი სამხედრო ჰყავთ დაკავებული.

გვიან ღამით, უკრაინაში ქვეყნის თავდაცვისა და უსაფრთხოების ეროვნული საბჭოს საგანგებო სხდომა გაიმართა, სადაც პრეზიდენტმა პოროშენკომ მხარი დაუჭირა სამხედრო კაბინეტის წინადადებას, უკრაინაში საომარი მდგომარეობის გამოცხადების შესახებ.