„პოზიცია, რომ ჯერ ეკლესიამ თქვას და მერე ჩვენ ვიტყვით, კიდევ ერთხელ მიუთითებს ჩვენი ხელისუფლების სრულ უსუსურობაზე ან იმაზე, რომ მათთვის რუსეთის აზრი უფრო წინ დგას, ვიდრე უკრაინის მიღწევები. ხელისუფლებას ჩვენი გასავლელი გზა გვაქვს. სამწუხაროა, რომ ხელისუფლება ამჯერადაც იმალება და საკუთარ პოზიციას არ აფიქსირებს,– ამის შესახებ „ევროპული საქართველოს“ ერთ-ერთმა ლიდერმა, დეპუტატმა დავით ბაქრაძემ განაცხადა.

მისი თქმით, ეკლესიას საკუთარი პოზიცია აქვს და საკუთარი გადაწყვეტილება უნდა მიიღოს.

„ჩვენ ეკლესიის გადაწყვეტილებაში ვერასდროს ვერ და არ ჩავერევით. ეს მათი გადასაწყვეტია, მაგრამ როგორც პოლიტიკოსებს და საქართველოს მოქალაქეებს, უფლება გვაქვს, ჩვენი აზრი გვქონდეს. უკრაინული ეკლესიის ავტოკეფალია შეესაბამება არა მხოლოდ უკრაინული, არამედ ქართული სახელმწიფოს ინტერესსაც, ამიტომ ვულოცავთ ჩვენ უკრაინას და უკრაინელ ხალხს. ეს კანონიკური მილოცვა არ არის“, – აღნიშნა ბაქრაძემ.

დეპუტატის შეფასებით, კანონიკურ გადაწყვეტილებას წმინდა სინოდი და საქართველოს ეკლესია მიიღებს.

„როგორ შეიძლება, ვინმეს ჩვენთვის საქართველოს ავტოკეფალია არ მოელოცა და ეთქვა, რომ უნდა დაველოდო, რას იტყვის რუსეთის პატრიარქი და მერე მოგილოცავთ ქართველებს ავტოკეფალიასო. სწორი იქნებოდა ხელის გაშვერა ეკლესიისკენ და დამალვა?“ – აღნიშნა „ევროპული საქართველოს“ ერთ-ერთმა ლიდერმა.