“ევროპული საქართველოს" დეპუტატი, ოთარ კახიძე ეხმიანება განათლების სამინისტროს გადაწყვეტილებას, რომლის მიხედვით, 2020 წლიდან ერთიან ეროვნულ გამოცდებზე ზოგადი უნარების გამოცდის ჩაბარება სავალდებულო აღარ იქნება.

„ნიკო ნიჭიერი ბავშვია, ის ღარიბი ოჯახიდანაა, რაიონში სწავლობს. მის სკოლაში განათლების ხარისხი დაბალია, მშობლებს რეპეტიტორებთან მომზადების ფულიც არა აქვთ.

ნიკო გადის ერთიან გამოცდებზე, ზოგად უნარებში იღებს მაღალ ქულას, საგნობრივში - საშუალოს. მას აძლევენ 100%-იან გრანტს და უხსნიან მომავალს.

დავითი ნაკლებად ნიჭიერი ბავშვია, მაგრამ შეძლებული ოჯახიდან. ის კერძო სკოლაში დადის და რეპეტიტორები სახლშიც აკითხავენ.

დავითი გადის გამოცდებზე, ზოგად უნარებში დაბალ ქულას იღებს, ხოლო საგნობრივში, სისტემატური მომზადების ხარჯზე - მაღალს.

განათლების სამინისტროს ნიკოს დაჩაგვრა სურს”, - ამბობს ოთარ კახიძე

როგორც შეფასებისა და გამოცდების ეროვნული ცენტრის დირექტორმა სოფო გორგოძემ განაცხადა, უნივერსიტეტებს უფლება ექნებათ, თავიანთი პროგრამის რელევანტური და არჩევითი გამოცდა (მათ შორის ზოგადი უნარები) სურვილის შემთხვევაში თავად დაამატონ.

2020 წლიდან ეროვნული გამოცდები ოთხის ნაცვლად, სამ სავალდებულო საგანში ჩატარდება.

ქართული ენისა და ლიტერატურის და უცხო ენის გამოცდები ყველა აბიტურიენტისთვის სავალდებულო იქნება.