ზუგდიდის მუნიციპალიტეტის ყოფილი მერის, ლაშა გოგიასა და ყოფილი ვიცე-მერის, გია გულორდავას საქმეზე წინასასამართლო სხდომა გაიმართა. ლაშა გოგია და  გია გულორდავა სახელმწიფო უსაფრთხოების სამსახურმა გასული წლის ნოემბერში, ქრთამის აღების ბრალდებით დააკავა. 

მათთან ერთად ასევე გაიმართა დანაშაულის შეუტყობინებლობის ბრალდებით დაკავებული, ზუგდიდის მერიის ერთ-ერთი დეპარტამენტის ყოფილი უფროსის, თენგიზ ქობალიასა და ცრუ ჩვენების მიცემის ბრალდებით დაკავებული ხუტა ბაღათურიას პროცესები.

ოთხივე ბრალდებულის ადვოკატი, წინასწარი პატიმრობის სანაცვლოდ, გირაოს შეფარდებას ითხოვდა, თუმცა მოსამართლემ მოთხოვნა არ დააკმაყოფილა.

სუს-მა გულორდავა და გოგია დიდი ოდენობით ქრთამის აღების ფაქტზე გასული წლის პირველ ნოემბერს დააკავა.

სუს-ის ინფორმაციით, 2018 წლის პირველ ნახევარში გოგიამ და გულორდავამ ქალაქ ზუგდიდში მდებარე გულუას ბაღისა და რკინიგზის სადგურის მიმდებარე ტერიტორიების აუქციონზე გატანის სანაცვლოდ მოქალაქეს ქრთამის სახით 21 500 აშშ დოლარი გამოართვეს.