საყდრისის აფეთქებიდან ერთი წელი გავიდა, ამ საკითხთან დაკავშირებით „ახალი მემარჯვენები“ განცხადებას ავრცელებს.

„ქართველი და უცხოელი მეცნიერების შეფასებით, საყდრისის სახით ჩვენ გვქონდა კულტურის უნიკალური ძეგლი - ოქროს სამთო მოპოვების მსოფლიოში უძველესი კერა, რომელიც ბევრად უფრო ძველი იყო, ვიდრე ადრე მიკვლეული სხვა საბადოები.

კულტურის  ამ უნიკალური ძეგლის დანგრევა დარჩება სირცხვილად „ქართული ოცნების" ხელისუფლებისთვის, რადგან სამწუხაროდ,  მათი მმართველობის პირობებში სახელმწფომ, რომელიც კულტურული მემკვიდრეობის ძეგლებს უნდა იცავდეს, ვერ შესძლო თავისი  უმნიშვნელოვანესი  ფუნქციის შესრულება.

საყდრისის შემთხვევაში ვერ იმუშავა ვერც ერთმა სახელმწიფო რგოლმა, რომელთა უშუალო მოვალეობა იყო  გაეთვალისწინებინათ როგორც მეცნიერების, ისე საზოგადოების აზრი და ხელი შეეშალათ კულტურული მემკვიდრეობის ძეგლის  ნგრევისთვის: პარლამენტმა, რომელმაც უარი თქვა კომისიის შექმნაზე და რეალობის დადგენაზე, კულტურის სამინისტრომ, რომელმაც კულტურის ინტერესების დაცვას  ქვეყნის არაფორმალური მმართველის  კომერციული ინტერესების დაცვა ამჯობინა, სასამართლომ და პროკურატურამ, რომელთა უშუალო მოვალეობა იყო  სამართლებრივად უზრუნველეყოთ ეს პროცესი და დაეცვათ სახელმწიფოს ინტერესები.

სამწუხაროდ, ვერც ერთმა მათგანმა ვერ მოახერხა ყოფილიყო მოწოდების  სიმაღლეზე და   ნაცვლად  კულტურული მემკვიდრეობის შენარჩუნებისა    დაირაზმა  იმის გასანადგურებლად,  რაც ერის კუთვნილება იყო,  შელახა საზოგადოების უფლებები და სახელმწიფოს ინტერესები.

მიუხედავად იმისა, რომ საყდრისი იმ სახით, როგორიც იყო,  ვეღარასოდეს იარსებებს, ჩვენ მაინც უნდა მოვახერხოთ ხელისუფლების პოლიტიკური პასუხისმგებლობის საკითხის დაყენება, რათა მომავალში  ვერც  ერთმა ხელისუფალმა  ვეღარ გაბედოს  იმოქმედოს ერის და სახელმწიფოს ინტერესების საწინააღმდეგოდ“, - ნათქვამია „ახალი მემარჯვენეების“ მიერ გავრცელებულ განცხადებაში.