დათვების თავშესაფარის დამფუძნებელი სოსო ჯიქურიშვილი განცხადებას ავრცელებს:

„რამდენიმე კვირაა, აქტიურად მივმართავ ქ. გორის მერიასა და გარემოს დაცვის სამინისტროს, რომ დათვს, რომელიც დატყვევებულია, სასწრაფოდ ესაჭიროება შესაფერისი პირობები. გორის მერია გვეთანხმება, რომ დათვი, მართლაც, მძიმე პირობაშია და გვპირდება მდგომარეობის გაუმჯობესებას, მაგრამ დაპირებას არ ასრულებს!

დათვების თავშესაფარმა შესთავაზა გორის მერიას, რომ დათვი თავშესაფარში გადმოგვეყვანა თუნდაც დროებით, სანამ შესაფერის ვოლიერს მოუწყობდნენ გორის ზოოპარკში. დღემდე ჩვენს შეთავაზებაზე პასუხი არა გვაქვს.

კიდევ ერთხელ მივმართავ გორის მუნიციპალიტეტის მერიას, გარემოს დაცვისა და სოფლის მეურნეობის სამინისტროს, რათა დროულად მიიღონ გადაწყვეტილება და დათვის ტანჯვა დაასრულონ!

ქვეყნის სირცხვილია, როცა სახელმწიფო დაწესებულება ასე უმოწყალოდ ექცევა „წითელი ნუსხით“ დაცულ გადაშენების საფრთხის წინაშე მყოფ მურა დათვს!“, - ნათქვამია განცხადებაში.