ერის ასეთი კონსოლიდაცია ბოლო 30 წლის განმავლობაში იშვიათად მახსენდება, - განაცხადა საქართველოს საგარეო საქმეთა მინისტრმა, დავით ზალკალიანმა დიპლომატიური მისიების წარმომადგენლებთან გამართული შეხვედრის შემდეგ, რომელიც 9 აპრილის მოვლენებს მიეძღვნა.

​„ეს არის ერთ-ერთი მნიშვნელოვანი მომენტი ჩვენი ქვეყნის დამოუკიდებლობის ისტორიაში, როდესაც, როგორც არასდროს, ისე იყო ერი გაერთიანებული. ერის ასეთი კონსოლიდაცია ბოლო 30 წლის განმავლობაში იშვიათად მახსენდება. ეს დღეს მართლაც ძალიან მნიშვნელოვანია. როდესაც ქვეყანას ასეთი სერიოზული გამოწვევები აქვს, ბუნებრივია, კონსოლიდაციის, ერთიანობის გარეშე ძალიან გაგვიჭირდება იმ გამოწვევების გამკლავება, რაც ქვეყნის ოკუპაციასთანაა დაკავშირებული“, – განაცხადა საქართველოს საგარეო საქმეთა მინისტრმა.

მისი თქმით, თავისუფლებისათვის ბრძოლა ჯერ დასრულებული არ არის და ამ ბრძოლის დასრულებისთვის ქვეყანა ევროპულ ოჯახში უნდა დაბრუნდეს.

მართლაც ფასდაუდებელი იმ ადამიანების წვლილი, ვინც თავი გაწირა და საკუთარი სიცოცხლის ფასად დამოუკიდებლობა მოგვიტანა. ახლა ჩვენზე ძალიან დიდი პასუხისმგებლობაა. მიზანი და ის ამოცანა, რომელიც დაგვისახეს, ბრძოლა დამოუკიდებლობისა და თავისუფლებისთვის ჯერ დასრულებული არ არის. იმისთვის, რომ ეს მისია დავასრულოთ, ქვეყანა ევროპულ ოჯახში აუცილებლად უნდა დავაბრუნოთ. ევროპული და ევროატლანტიკური ინტეგრაცია ამ მისიის დამაგვირგვინებელი და დამასრულებელი ფასი იქნება“, – განაცხადა დავით ზალკალიანმა.