იანვარ-ნოემბრში აჭარაში ტურისტების რაოდენობა 2,73%-ით გაიზარდა. აჭარის ტურიზმისა და კურორტების დეპარტამენტის მიერ წარმოებული სტატისტიკის მიხედვით აჭარის მასშტაბით რეგისტრირებული განთავსების ობიექტებში ნოემბრის თვეში გასული წლის ანალოგიურ პერიოდთან შედარებით ტურისტების 1,23 %-იანი ზრდა დაფიქსირდა.

რაც შეეხება 2015 წლის იანვარ-ნოემბრის პერიოდს (11 თვე), გასულ წელთან შედარებით ტურისტების 2,73%-იანი ზრდა შეინიშნება.

საზღვრის მონაცემების მიხედვით საერთაშორისო ვიზიტორთა ზრდის დადებითი ტენდენცია შეინიშნება ბათუმის საერთაშორისო აეროპორტშიც. 2015 წლის ნოემბრის თვეში ბათუმის აეროპორტში გასული წლის ანალოგიურ პერიოდთან შედარებით ტურისტების 83%-იანი ზრდა დაფიქსირდა (3 975 ვიზიტორი).

რაც შეეხება 11 თვის მონაცემებს (იანვარ-ნოემბერი) ბათუმის აეროპორტში საერთაშორისო ფრენებით შემოსულ უცხოელ მგზავრთა რაოდენობა გასულ წელთან შედარებით 16%-ითაა გაზრდილი, სულ 74151 ვიზიტორი.

ზრდადი ტენდენცია ნარჩუნდება საზღვარზე შემოსულ უცხოელ ვიზიტორებთან დაკავშირებითაც. ნოემბერში გასული წლის ანალოგიურ პერიოდთან შედარებით ტურისტების 4,61%- იანი ზრდა ფიქსირდება, სულ 105 991 ვიზიტორი. ქვეყნების მიხედვით პირველ ხუთეულში შედის თურქეთი, აზერბაიჯანი, რუსეთი, უკრაინა და სომხეთი.