რუსეთის პრეზიდენტმა ვლადიმირ პუტინმა ფრანგ კოლეგას, ემანუელ მაკრონს პარიზის ღვთისმშობლის ტაძრის აღდგენაში დახმარება შესთავაზა და ამისთვის საფრანგეთში რუსი საუკეთესო სპეციალისტების გაგზავნის თაობაზე მზადყოფნა გამოთქვა. რუსეთის პრეზიდენტმა მაკრონისადმი გაგზავნილ ტელეგრამაში ნოტრ-დამში გაჩენილი ხანძრის გამო მწუხარება გამოთქვა და აღნიშნა, რომ ის ევროპისა და მსოფლიო კულტურისთვის ფასდაუდებელი საგანძურია. პუტინის თქმით, პარიზში მომხდარმა ტრაგედიამ რუსების გულში დიდი ტკივილი დატოვა.

„პუტინმა ტაძრის აღდგენის იმედი გამოთქვა და საფრანგეთს შესთავაზა რუსი სპეციალისტების გაგზავნა, რომლებსაც მსოფლიო კულტურული მემკვიდრეობის ძეგლების აღდგენის მდიდარი გამოცდილება აქვთ“, - ნათქვამია კრემლის მიერ გავრცელებულ განცხადებაში.

ნოტრ-დამში ხანძარი 15 აპრილს საღამოს გაჩნდა. შედეგად ჩამოინგრა შპილი, ტაძრის ხის სახურავი მთლიანად დაიწვა. თუმცა მეხანძრეებმა პარიზის ღვთისმშობლის ტაძრის სტრუქტურის სრული განადგურებისგან გადარჩენა შეძლეს. გადარჩენილია მთავარი რელიკვიები – მაცხოვრის ეკლის გვირგვინი და წმინდა ლუის ტუნიკა. ასევე საკურთხეველი და საკურთხევლის ჯვარი.