პარიზის მერმა ან იდალგომ განაცხადა, რომ ქალაქის მერია პარიზის ღვთისმშობლის ტაძრის აღდგენისთვის 50 მლნ ევროს გამოყოფს.

საფრანგეთის დედაქალაქის რეგიონის ილ-დე-ფრანსის ხელმძღვანელმა ვალერი პეკრესმა ტაძრის აღსადგენად 10 მლნ ევროს გამოყოფის შესახებ განაცხადა.

ფრანგი ბიზნესმენი კომპანია LVMH-ის ჯგუფის პრეზიდენტი ბერნარ არნო ტაძარს 200 მლნ ევროთი დაეხმარება. ფრანგი მილიარდერი, კორპორაცია Kering-ის პრეზიდენტი ფრანსუა-ანრი პინო კი პარიზის ღვთისმშობლის ტაძრის აღსადგენად 100 მლნ ევროს გამოყოფს.

ნოტრ-დამში ხანძარი 15 აპრილს საღამოს გაჩნდა. შედეგად ჩამოინგრა შპილი, ტაძრის ხის სახურავი მთლიანად დაიწვა. თუმცა მეხანძრეებმა პარიზის ღვთისმშობლის ტაძრის სტრუქტურის სრული განადგურებისგან გადარჩენა შეძლეს. გადარჩენილია მთავარი რელიკვიები – მაცხოვრის ეკლის გვირგვინი და წმინდა ლუის ტუნიკა. ასევე საკურთხეველი და საკურთხევლის ჯვარი.