საქართველოს რეგიონული გავითარებისა და ინფრასტრუქტურის მინისტრმა ნოდარ ჯავახიშვილმა და ევროპის საბჭოს ადგილობრივი და რეგიონული ხელისუფლების ორგანოთა კონგრესის პრეზიდენტმა ჟან-კლოდ ფრეკონმა ხელი მოაწერეს გზამკვლევს  „ადგილობრივი და რეგიონული დემოკრატიისათვის საქართველოში“.

აღნიშნულ გზამკვლევზე ხელმოწერით, მხარეები იღებენ ვალდებულებას განაგრძონ თანამშრომლობა და პოლიტიკური დიალოგი, ადგილობრივი და რეგიონული დემოკრატიის განვითარების მიზნით, ადგილობრივი თვითთმართველობების შესახებ ევროპული ქარტიის ფარგლებში.

საქართველომ წარმატებით შეასრულა ევროსაბჭოს ადგილობრივი და რეგიონული ხელისუფლების ორგანოთა კონგრესის 2013 წლის რეკომენდაციები თვითმმართველობის რეფორმის ფარგლებში, რასაც კონგრესის პოზიტიური რეზოლუცია ადასტურებს.

გზამკვლევი ითვალისწინებს:

• ადგილობრივი თვითმმართველობების ფინანსური დამოუკიდებლობისკენ გადადგმულ ნაბიჯებს;
• კონსტიტუციაში ცვლილების შეტანას, ადგილობრივი თვითმმართველობის სფეროში სუბსიდიარობის პრინციპის ასახვისათვის;
• ადგილობრივ და ცენტრალურ ხელისუფლებას შორის კონსულტაციებს რეგიონული განვითარების მიზნით;
• მიმდინარე დეცენტრალიზაციის პროცესის მონიტორინგს.

თვითმმართველობის რეფორმის მიმართულებით საქართველომ უკვე არაერთი ნაბიჯი გადადგა, მათ შორის:  შემუშავებული და დამტკიცებული იქნა თვითმმართველობის ახალი კოდექსი, შეტანილ იქნა ცვლილებები ადგილობრივი თვითმმართველობების ადმინისტრაციული  და ტერიტორიული მოწყობის საკითხში, განხორციელდა აქტივობები  მათი ფინანსური დამოუკიდებლობის მიმართულებით და ა.შ.