ქუთაისის საქალაქო სასამართლომ მორაგბე მერაბ კვრიკაშვილი უდანაშაულოდ ცნო. სასამართლოს მოსამართლე მურთაზ კაპანაძემ განაჩენი ცოტა ხნის წინ გამოაცხადა.

მოსამართლის განცხადებით, კვირიკაშვილს გაუუქმდება 15 ათასლარიანი გირაო, რომელიც სასამართლომ მას 2017 წლის ოქტომბერში შეუფარდა. ასევე ყადაღა მოეხსნება მის სახლს.

ასევე, მერაბ კვირიკაშვილს დაუბრუნდება „ბე-ემ-ვეს“ მარკის ავტომობილი,  რომელიც ავტოსადგომზე იყო. განაჩენის გამოცხადებას მერაბ კვირიკაშვილი ესწრებოდა.

ავტოსაგზაო შემთხვევა 2016 წლის 21 ივლისს ქუთაისის შემოვლით გზაზე, სოფელ ოფშკვითში მოხდა. შემთხვევის შედეგად მერაბ კვირიკაშვილის მეუღლე, ასევე 26 წლის გიორგი პაპასკირი, მისი მეუღლე და მათი მეგობარი დაიღუპნენ.

კვირიკაშვილს ბრალი საქართველოს სისხლის სამართლის კოდექსის 276-ე მუხლის მე-7 ნაწილით წარუდგინეს, რაც ტრანსპორტის მოძრაობის ან ექსპლუატაციის წესების დარღვევას გულისხმობს, რამაც გამოიწვია ორი ან მეტი ადამიანის სიცოცხლის მოსპობა (დანაშაული ითვალისწინებს 10-წლამდე თავისუფლების აღკვეთას).

2017 წლის ოქტომბერში კვირიკაშვილს სასამართლომ 15 ათასი ლარის გირაო შეუფარდა.