გაერთიანებული ოპოზიციის ,,ძალა ერთობაშია” წევრები საკრებულოს ფრაქცია „ქართული ოცნება-კონსერვატორების“ უკვე ყოფილი თავმჯდომარის, ნანა კოსტავასთვის საკრებულოს წევრის უფლებამოსილების შეწყვეტას მოითხოვენ.

მათ ქუთაისში, მერიის შენობის წინ საპროტესტო აქცია გამართეს.

აქციის მონაწილეები მერიასთან მივიდნენ შემდეგი შინაარსის ტრანსფარანტებით: „შეუწყდეს უფლებამოსილება ნანა კოსტავას”, „არა სიძულვილის ენას”, ნანა კოსტავა – ქალაქის სირცხვილი”.

ქუთაისის საკრებულოს ფრაქცია „ქართული ოცნება-კონსერვატორების“ თავმჯდომარემ ნანა კოსტავამ თანამდებობა დატოვა.

ფრაქცია „ქართული ოცნება-კონსერვატორების“ თავმჯდომარის გადადგომასთან დაკავშირებით გადაწყვეტილება ფრაქციის წევრებმა დღეს გამართულ სხდომაზე მიიღეს.

ფრაქციას დღეიდან ძელქვიანის მაჟორიტარი დეპუტატი ნიკოლოზ ჩეჩელაშვილი უხელმძღვანელებს.

ნანა კოსტავამ გუშინ სოციალური მედიის მენეჯერ სალომე ბარკერის 2018 წლის ერთ-ერთი  პოსტი გააზიარა წარწერით “კაი დღეში ხარ ახლა, იცინე!”.  

პოსტში, რომელიც მან გააზიარა, სალომე ბარკერს თითებზე პრეზერვატივი აქვს გაკეთებული, რითიც კომპანია "აიისას" საქმეზე მოსამართლე ლევან მურუსიძის მიერ მიღებულ გადაწყვეტილებას აპროტესტებს.

როგორც ცნობილია, სალომე ბარკერის 16 წლის და რამდენიმე დღის  წინ ლაგოდეხის ნაკრძალში დაიღუპა.

მოგვიანებით ნანა კოსტავამ სოციალურ ქსელში სტატუსი გამოაქვეყნა, სადაც დაწერა, რომ არ იცოდა სალომე ბარკერის ტრაგედიის შესახებ და ბოდიში მოიხადა.

ქუთაისში მოქმედმა მედიასაშუალებების წარმომადგენლებმა ნანა კოსტავას მიერ გაკეთებულ განცხადებასთან დაკავშირებით ერთობლივი მიმართვა გაავრცელეს, სადაც ნათქვამია, რომ დეპუტატს ბოიკოტს უცხადებენ და ნანა კოსტავას აღარ მიეცემა საშუალება, გამოიყენოს ქუთაისში არსებული საინფორმაციო პლატფორმა.