ვაკის რაიონის გამგეობამ მოსახლეობას წლიური ანგარიში წარუდგინა. გამგეობის მიერ 2015 წელს განხორციელებული მნიშვნელოვანი პროექტები გამგებელმა ნოდარ ტურძელაძემ ადგილობრივ მოსახლეობასთან ერთად თბილისის მთავრობის და საკრებულოს წევრებს გააცნო.

2015 წელს ვაკის რაიონის გამგეობამ ინფრასტრუქტურულ პროექტებსა და კეთილმოწყობის ღონისძიებებზე  2 946 000 ლარი დახარჯა. გზის კეთილმოწყობის სამუშაოები 67 ობიექტზე განხორციელდა და მასზე  3 831 000 ლარი დაიხარჯა. ვაკეში რეაბილიტაცია ჩაუტარდა და მოეწყო 31 სკვერი, 16 სპორტული მოედანი, ასევე, გაკეთდა 11 საყრდენი კედელი, ამათგან 6 კედელი მოეწყო სტიქიით გამოწვეული დაზიანებების თავიდან აცილების მიზნით. 2 364 406 ლარით დაფინანსდა ბინათმესაკუთრეთა ამხანაგობების 405 პროექტი. სოციალური დახმარება გაეწია 7 477 მოქალაქეს და ამ დახმარებებზე 2 928 209 ლარი დაიხარჯა.

ვაკის გამგებელმა დეტალურად ისაუბრა 13-14 ივნისის სტიქიის შედეგების სალიკვიდაციო სამუშაოებზე. განხორციელდა სტიქიის შედეგად დაზიანებული სახლების დემონტაჟი და სპეც. ტექნიკით გაიწმინდა სტიქიით დაზიანებული უბნები. ასევე, მოეწყო 6 საყრდენი კედელი და  აღდგა ვაკის სასაფლაოსთან მისასვლელი გზა.

13 ივნისის სტიქიით დაზარალებული მოქალაქეების სტიქიის დღიდან მოყოლებული დროებითი საცხოვრისით უზრუნველყოფაში 705.735 ლარი დაიხარჯა. ერთჯერადი ფინანსური დახმარება 138 ოჯახს გაეწია, სულ გადარიცხულია 1 255 000 ლარი. ამჟამად გამგეობა ბინის ქირით 78 ოჯახს უზრუნველყოფს.  ამასთან, როგორც გამგებელმა აღნიშნა, აქტიურად მიმდინარეობს II კატეგორიის დაზარალებულთა ბინების სარემონტო-სარეაბილიტაციო სამუშაოები. 

ნოდარ ტურძელაძემ სამომავლო გეგმებზეც ისაუბრა და განაცხადა, რომ 2016 წელს ადგილობრივ დონეზე არსებული გამოწვევების დასაძლევად ეფექტურ ღონისძიებებს გეგმავს.  

პრეზენტაცია ვაკის რაიონის გამგეობაში გაიმართა. მას თბილისის მერის მოადგილე გიორგი სოლომონია, საკრებულოს მაჟორიტარი დეპუტატები გიორგი მუსხელიშვილი და კობა ბაბუნაშვილი, ასევე საკრებულოს სხვს წარმომადგენლები და რამდენიმე რაიონის გამგებელი ესწრებოდნენ.