ბრაზილიის მსხვილი ნარკოდაჯგუფების ლიდერი კლაუვინო და სილვა ციხიდან გაქცევას თავის ქალიშვილად გარდასხვის შედეგად ცდილობდა. მან გოგონასთან დამსგავსება სილიკონის ნიღბითა და პარიკის მეშვეობით შეძლო. იუწყება The Guardian-ი.

გამოცემის ცნობით, 42 წლის მამაკაცი რიო-დე-ჟანეიროს ციხეში თავის სანაცვლოდ შვილის დატოვებას აპირებდა, საამისოდ ის  გოგონას სამოსში გამოეწყო, ჩაიცვა ვიწრო ჯინსის შარვალი, ბიუსჰალტერი და ვარდისფერი სპორტული მაისური. ამის გარდა გაიკეთა სილიკონის ნიღაბი ქალის ნაკვთებით, გრძელთმიანი პარიკი  და სათვალე. თუმცა, როგორც პოლიცია აღნიშნავს, გასვლის დროს ის საკუთარმა ნერვიულობამ გასცა.

ხელისუფლებამ მოგვიანებით გაავრცელა ვიდეოჩანაწერი, სადაც ჩანს, თუ როგორ იხსნის და სილვა ნიღაბსა და პარიკს, შემდეგ კი სამოსს იხდის.

პოლიციელები არკვევენ, იყო თუ არა ნარკობარონის 19 წლის ქალიშვილი გაქცევის მცდელობის თანამონაწილე. და სილვა მკაცრი რეჟიმის საპყრობილეშია გადაყვანილი. მას გაქცევის მცდლობისთვის სასჯლი ემუქრება.

და სილვა ბრაზილიაში ყველაზე ძლევამოსილი კრიმინალური დაჯგუფების ერთ-ერთი ლიდერია, რომელიც რიოს უდიდეს ნაწილში ნარკოვაჭრობას აკონტროლებს.