ოპოზიციური მაუწყებლების არსებობა ძალიან მნიშვნელოვანია ქვეყნის დემოკრატიული განვითარებისთვის და ამას მივესალმები – ამის შესახებ თბილისის მერმა, პარტია „ქართული ოცნების“ გენერალურმა მდივანმა, კახა კალაძემ განაცხადა. მან ტელეკომპანია „რუსთავი 2“-დან თანამშრომლების გათავისუფლებასთან დაკავშირებით აღნიშნა, რომ  საკადრო ცვლილებები არის კერძო მესაკუთრის გადაწყვეტილება. მისივე თქმით, მთავარი და მნიშვნელოვანია, ქვეყანაში სიტყვის თავისუფლების არსებობა.

„არ ვიცი, რამდენად სწორი იქნება ამ საკითხზე ჩემი შეფასება. საკადრო ცვლილებები არის კერძო მესაკუთრის გადაწყვეტილება. ჩვენთვის მთავარი და მნიშვნელოვანია, რომ ქვეყანაში არსებობს სიტყვის თავისუფლება, მნიშვნელოვანია, რომ არის მედიაპლურალიზმი. როგორც მოვისმინეთ, ეს ადამიანები აპირებენ ახალი ტელევიზიის შექმნას. ვფიქრობ, რომ ეს არის ძალიან მნიშვნელოვანი და ზოგადად ქვეყნისთვის, ქვეყნის დემოკრატიული განვითარებისთვის ის, რომ არსებობდეს ოპოზიციური ტელევიზიები, ოპოზიციური მაუწყებლები, სააგენტოები არის ძალიან მნიშვნელოვანი და ამას მივესალმები“, – განაცხადა კახა კალაძემ.