თურქეთის პრეზიდენტი რეჯებ ტაიპ ერდოღანი ჟუკოვსკში რუსეთის ავიასალონს ეწვია, სადაც მას არაერთი წინადადება შესთავაზეს, მათ შორის ფრიად ძვირადღირებულიც.

ავიასალონში ექსკურსიის დროს ერდოღანმა დიდი ინტერესი გამოხატა მეხუთე თაობის რუსულ უახლეს მოიერიშე თვითმფრინავ  სუ-57-ის შეძენაზე.

მოგვიანებით პრეს-კონფერენციაზე ვლადიმირ პუტინმა განაცხადა, რომ რუსეთი მზად არის თურქ მფრინავებს მოერიშე სუ-30-ს მართვა შეასწავლონ.

რუსეთის სახელმწიფო კორპორაციის „როსკოსმოსის“ დირექტორმა დიმიტრი როგოზინმა ერდოღანს შესთავაზა საერთაშორისო კოსმოსურ სადგურზე თურქი ასტრონავტის გაგზავნის ორგანიზება.

თურქეთის ლიდერი დაეთანხმა და განაცხადა რომ მზად არის შეუერთდეს ამ სამუშაოს.

ასევე ცნობილი გახდა, რომ 1 სექტემბრიდან დაიწყება თურქი სამხედროების სწავლება სარაკეტო-საზენიტო კომპლექსების  С-400-ის მართვასთან დაკავშირებით, რომელიც მომავლი წლის 2 იანვრამდე გაგრძელდება.

პუტინმა ასევე განაცხადა, რომ რუსული გაზი მილსადენ „თურქეთის ნაკადის“ გავლით თურქეთს მიმდინარე წლის ბოლოსთვის მიეწოდება.

ავიასალონში გასეირნების დროს, პუტინი თურქ კოლეგას ნაყინით გაუმასპინძლდა. ერდოღანმა ვოლოგოდის ვანილის ნაყინი შეარჩია, პუტინმა კი შოკოლადისა და ნაღების ჭიქის ნაყინი ამჯობინა.

 „ჩემსასაც გადაიხდი? - ჰკითხა ერდოღანმა. „გადავიხდი, შენ ხომ სტუმარი ხარ!“,- უპასუხა პუტინმა.

გამყიდველმა საერთო თანხა - 210 რუბლი დაასახელა. პუტინმა მას 5-ათასიანი კუპიურა მიაწოდა.

 „ხურდა მინისტრს მიეცით, - თქვა პუტინმა და მრეწველობისა და ვაჭრობის მინისტრზე დენის მანტუროვზე მიუთითა.