აშშ-ის ადმინისტრაცაში მაღალი თანამდებობის პირმა ჟურნალისტებთან სატელეფონო ბრიფინგის დროს განაცხადა, რომ დიონალდ ტრამპის გადაწყვეტილება ჯარის გადაადგილების შესახებ, სირიიდან სამხედროების გაყვანას არ ნიშნავს. ამის შესახებ ამერიკული მედია იტყობინება.

 „ეს არ ნიშნავს სირიიდან ჯარის გაყვანას, საუბარია სამხედროების მცირე ნაწილის გაადაგილებაზე“, - განაცხადა მან.

მისი თქმით, საუბარია 50-100 სამხედრო მოსამსახურეზე, რომლებსაც რეგიონში სხვა ბაზებზე გადაიყვანენ.

თეთრი სახლის წარმომადგენელმა ასევე უარყო ბრალდება, რომ თითქოს ტრამპმა მწვანე შუქი აუნთო თურქეთს სირიაში ოპერაციის ჩასატარებლად.

 „დღეს New York Times-ში ვნახე (სტატიის, რედ.) სათაური, რომ პრეზიდენტმა ჩრდილოეთ სირიაში ოპერაციის ჩატარებას მხარი დაუჭირა. ჩვენ ნათლად განვმარტეთ, რომ მხარს არ ვუჭერდით და არც მომავალში დავუჭერთ სირიის ჩრდილოეთით სამხედრო ოპერაციას“, - განაცხადა ადმინისტრაციის წარმომადგენელმა.

მანამდე აშშ-ის პრეზიდენტმა განაცხად, რომ მიიღო გადაწყვეტილება ჩრდილოეთ სირიიდან სამხედროების გაყვანის შესახებ, რადგან იქ ბრძოლა აღარ სურს. „გვინდა, რომ ჩვენი სამხედროები სახლში დაბრუნდნენ. ეს იყო ჩემი წინასაარჩევნო დაპირება“, - განაცხადა ტრამპმა.

შეგახსენებთ, თურქეთის პრეზიდენტმა რეჯებ თაიფ ერდოღანმა განაცხადა, რომ ანკარა მზად არის დამოუკიდებლად ჩაატაროს სამხედრო ოპერაცია თავის საზღვართან, სირიის ჩრდილო-აღმოსავლეთით, სადაც თურქეთი და აშშ თავდაპირველად უსაფრთხოების ზონის შექმნაზე შეთანხმდნენ. ერდოღანს მიაჩნია, რომ ამერიკის ხელისუფლებამ თავისი დაპირება არ შეასრულა.

დამოუკიდებელი სპეცოპერაციის ჩატარების შესახებ თურქეთის ლიდერმა 1 ოქტომბერს განაცხადა. ხუთი დღის შემდეგ ის ტელეფონით ესაუბრა აშშ-ის პრეზიდენტს, რომლის შედეგების მიხედვით, თეთრმა სახლმა განაცხადა, რომ მხარს არ დაუჭერს თურქეთის ხელისუფლების მოქმედებებს სირიის ჩრდილოეთით. ამ რეგიონში განლაგებულია ქურთთა ძალები, რომლებიც აშშ-ს მოკავშირეები არიან, თურქეთი კი მათ ტერორისტებად მიიჩნევს.