რუსი ჰაკერის საქართველოდან ექსტრადიცია განხორციელდა. იაროსლავ სუმბაევი რუსეთის მხარეს ლარსის გამშვებ პუნქტზე, ცოტა ხნის წინ  გადასცეს.

იაროსლავ სუმბაევი საქართველოში გასული წლის ნოემბერში დააკავეს. რუსეთი მის  გადაცემას ჯერ კიდევ მაისში ითხოვდა. პირველ მაისს ჰაკერის ექსტრადირება დასაშვებად ჯერ საქალაქო სასამართლომ ცნო, გასაჩივრების შემდეგ კი იგივე გადაწყვეტილება თვის ბოლოს უზენაესმა სასამართლომ გამოიტანა. 

იაროსლავ სუმბაევი რუსეთში უძლიერესი IT სპეციალისტების სამეულში ჰყავთ შეყვანილი. ის არაერთ თაღლითურ დანაშაულშია ბრალდებული, მათ შორის დიდი ოდენობით ფულის მითვისებაში რკინიგზის გაყიდული ბილეთებიდან, ასევე თანხების მოხსნაში ბანკომატებიდან.

სუმბაევი ეჭვმიტანილია რუსი გამომძიებლის, ევგენია შიშკინას მკვლელობის ორგანიზებაში, რომელიც სწორედ სუმბაევის საქმეს იძიებდა. ჰაკერი, რომელიც მკვლელობის დროს საქართველოში იმყოფებოდა დანაშაულთან კავშირს  უარყოფს.