საქართველოში შვეიცარიის საელჩოს რუსეთის ინტერესების სექცია რუსეთის მოქალაქეებს მოუწოდებს თბილისში, საპროტესტო აქციების გამო, ხალხმრავალ ადგილებს მოერიდონ.

 „გაცნობებთ, რომ 17 ნოემბერს თბილისის ცენტრში (რუსთაველის გამზირი, თავისუფლების მოედანი) ოპოზიციური პოლიტიკური ძალების მხრიდან დაგეგმილია რამდენიმე ანტისამთავრობო მიტინგი და  დემონსტრაცია. სექცია რუსეთის ფედერაციის მოქალაქეებს, რომლებიც საქართველოში იმყოფებიან, რეკომენდაციას აძლევს, გამოიჩინონ სიფრთხილე და მოერიდონ ხალხმრავალ ადგილებს“, - ნათქვამია მიკრობლოგ „ტვიტერზე“
 გამოქვეყნებულ შვეიცარიის საელჩოს რუსული სექციის განცხადებაში.

ოპოზიციური პარტიების ლიდერებმა შეკრება და ერთიანი სამოქმედო გეგმის შემუშავება გუშინ მას შემდეგ გადაწყვიტეს, რაც დღის პირველ ნახევარში, პარლამენტმა ქართული ოცნების მიერ ინიცირებული საკონსტიტუციო ცვლილების პროექტი ჩააგდო, რომელიც 2020 წელს საპარლამენტო არჩევნების პროპორციული სისტემით ჩატარებას ითვალისწინებდა.

საპარლამენტო და არასაპარლამენტო ოპოზიციურმა პარტიებმა, სამოქალაქო აქტივისტებთან ერთად, ლეობორისტული პარტიის ოფისში პოლიტიკური კონსულტაციის შემდეგ, ერთობლივი სამოქმედო გეგმა შეიმუშავეს და მთავარ მოთხოვნებზე ჩამოყალიბდნენ. ოპოზიციის სრული სპექტრი „გარდამავალი მთავრობის“ პირობებში ვადამდელი საპარლამენტო არჩევნების პროპორციული წესით ჩატარებაზე შეთანხმდა, რისთვისაც, მათივე თქმით, „ეროვნული თანხმობის კომიტეტი“ შეიქმნება. ამ დროისთვის ისევ გადაკეტილია რუსთაველის გამზირი, სადაც კარვებია გაშლილი. დღეს 19 საათზე საპროტესტო აქცია კვლავ განახლდება.

17 ნომებერს დაგეგმილია რუსთაველის გამზირზე საპარლამენტო და არასაპარლამენტო ოპოზიციური პარტიების საპროტესტო აქცია. საპროტესტო აქციის გაამრთვა თავისუფლების მოედანზე დააანონსა „პატრიოტთა ალიანსის“ერთ-ერთმა ლიდერმა ირმა ინაშვილმაც.