მნიშვნელოვანია ის, რომ ჩვენს ქვეყანაში სწორედ „ქართული ოცნების“ ხელისუფლების პირობებში არის მაქსიმალურად უზრუნველყოფილი გამოხატვის თავისუფლება, იქნება ეს ყვავილებით თუ ბოქლომების საშუალებით, - ამის შესახებ იუსტიციის მინისტრმა, თეა წულუკიანმა, აქციებთან დაკავშირებით განუცხადა ჟურნალისტებს მთავრობის ადმინისტრაციაში, სადაც მთავრობის სხდომა მიმდინარეობს.

„პირველი და მნიშვნელოვანი არის ის, რომ ჩვენს ქვეყანაში სწორედ „ქართული ოცნების“ ხელისუფლების პირობებში არის მაქსიმალურად უზრუნველყოფილი გამოხატვის თავისუფლება, იქნება ეს ყვავილებით თუ ბოქლომების საშუალებით. მთავარია, რომ არ დაირღვეს კანონი და სახელმწიფომ განაგრძოს ფუნქციონირება“, – განაცხადა თეა წულუკიანმა.

მისი თქმით, ზღვარის გადალახვის შემთხვევაში, სახელმწიფო შესაბამისად იმოქმედებს.

„ყოველთვის, როდესაც ეს ზღვარი იქნება გადალახული და პროტესტს არავითარი კავშირი აღარ ექნება გამოხატვის თავისუფლებასთან, სახელმწიფო იმოქმედებს ისე, როგორც იმოქმედა რამდენიმე დღის წინ“, – განაცხადა თეა წულუკიანმა. მან მადლობა გადაუხადა პოლიციელებსა და სპეცრაზმელებს, რამდენიმე დღის წინ ჩატარებული ოპერაციისთვის, რომელიც მისი თქმით, მაღალი კლასის იყო.

მთავრობის ადმინისტრაციასთან საპროტესტო აქცია მიმდინარეობს. აქციის მონაწილეები ცდილობენ ბოქლომი დაადონ კანცელარიის სამანქანო შესასვლელის ჭიშკარს, რის საშუალებასაც საპატრულო პოლიციის წარმომადგენლები არ აძლევენ.