ჩემთვის დამხობა, როგორც ამას სხვები ხმარობენ, არის არჩევნების გზით ხელისუფლების გადაგდება, ხელისუფლების შეცვლა, გასტუმრება ოპოზიციაში, - ამის შესახებ „ევროპული საქართველოს“ წევრმა, სერგი კაპანაძემ განაცხადა.
მისი თქმით, ოპოზიციისთვის ამ სიტუაციაში ამ პოლიტიკურ დაპირისპირებაში მისაღები არის მხოლოდ მშვიდობიანი გზით ივანიშვილის ჩამოშორება ხელისუფლებიდან.
კაპანაძემ ნიკა გვარამიას მიერ სოციალურ ქსელში გამოქვეყნებული სტატუსის კომენტირებისას აღნიშნა, რომ ოპოზიციის ამოცანაა ბიძინა ივანიშვილის დამარცხება.
„ჩვენი ამოცანაა, ივანიშვილი მოვაშოროთ ქვეყნის ხელისუფლებას და ეს გავაკეთოთ არჩევნების გზით. სწორედ ამიტომ არის ჩვენი ყველა ნაბიჯი გადადგმული, სწორედ ამიტომ არის ეს საარჩევნო სისტემა შეთავაზებული. ივანიშვილმა იმდენად გაიდგა ფესვები ყველგან, მათ შორის თავისი ფულის გამო, დაშინების, მოსყიდვის, სხვა არალეგიტიმური ქმედების გამო, მისი დამარცხება და ხელისუფლებისგან მოშორება შეიძლება, იყოს დამხობის სინონიმის მქონე, გამომდინარე იქიდან, რამდენად მტკივნეული შეიძლება იყოს მისთვის ეს პროცესი. ამიტომ ჩემთვის დამხობა, როგორც ამას სხვები ხმარობენ, არის არჩევნების გზით ხელისუფლების გადაგდება, ხელისუფლების შეცვლა, გასტუმრება ოპოზიციაში“, – განაცხადა სერგი კაპანაძემ.
„ჩვენ, ქართველმა პატრიოტმა მედასავლეთეებმა, უნდა გამოვიყენოთ ქვეყნის გადარჩენის ბოლო ლეგიტიმური გზა და უზურპატორი, თავის ხუნვეიბიენებიან მანქურთებიანად, უნდა დავამხოთ”, - დაწერა „ფეისბუქში“ტელეკომპანია „მთავარი არხის“ გენერალურმა დირექტორმა ნიკა გვარამიამ