ევროკავშირის საგარეო ქმედებათა სამსახური, "ევროპული საქართველოს" ერთ-ერთი ლიდერის გიგი უგულავას დაკავებასთან დაკავშირებით განცხადებას ავრცელებს.

"ევროკავშირი ყურადღებით აკვირდება საქართველოს უზენაესი სასამართლოს ბოლო გადაწყვეტილებას ოპოზიციის ლიდერის გიგი უგულავას საქმეზე.

ამ განაჩენის ირგვლივ არსებული გარემოებები ხელს არ უწყობს პოლიტიკურ დიალოგის წინსვლას, რომელიც მიზნად ისახავს საქართველოში პოლიტიკური ვითარების დეპოლარიზაციას.

სასამართლო დამოუკიდებლობის, სამართლიანი სასამართლოსა და კანონის უზენაესობის უმაღლესი სტანდარტების შესრულება წარმოადგენს საქართველოს არსებით ვალდებულებას ევროკავშირსა და საქართველოს ასოცირების ხელშეკრულების შესაბამისად.

ევროკავშირი ასევე გააგრძელებს საქართველოში ყველა სხვა პროცესის მონიტორინგს, რომლებიც დაკავშირებულია გახმაურებულ საქმეებთან", - აღნიშნულია განცხადებაში.