საქართველოში კორონავირუსის ცხრა ახალი შემთხვევიდან, ერთის წყარო დაუდგენელია - ამის შესახებ თბილისის ინფექციური საავადმყოფოს სამედიცინო დირექტორმა მარინა ეზუგბაიამ ჟურნალისტებს განუცხადა. აღნიშნული შემთხვევა თბილისში გამოვლინდა.

მისი თქმით, ინფიცირებულთა შორის სამი სამედიცინო პერსონალია, კიდევ სამი საკარანტინო სივრციდან არის, ორი უკვე დადასტურებულ შემთხვევასთან კონტაქტში მყოფი პირია.
„ერთის წყარო დაუდგენელია და მიმდინარეობს ჩაღრმავებული ეპიდემიოლოგიური კვლევა. ეს ინფიცირებული პაციენტი თბილისშია. წყაროს მოძიება გრძელდება“,- განაცხადა ეზუგბაიამ.
ამ დროისთვის კოვიდ-ცენტრებში 127 პაციენტი მკურნალობს.

„გუშინდელი მონაცემებით იყო 828, დაგვემატა ცხრა ახალი შემთხვევა და გვყავს 837. გამოჯანმრთელებულთა რიცხვი არის ჯამში 697, რაც ინფიცირებულების 83 პროცენტს შეადგენს. ცხრა ახალიდან სამი სამედიცინო პერსონალია, სამი გახლავთ საკარანტინო ზონიდან, შემოტანილი, ანუ იმპორტირებული შემთხვევა, ორი არის უკვე დადასტურებულ კოვიდინფიცირებულ პაციენტთან კონტაქტში მყოფი პირი, ერთის წყარო დაუდგენელია და მიმდინარეობს ჩაღრმავებული ეპიდემიოლოგიური კვლევა“,- განაცხადა მარინა ეზუგბაიამ.