მედიისთვის გიორგი შაქარაშვილის გარდაცვალების საქმის ახალი დეტალები გახდა ცნობილი. კერძოდ, ფეხბურთელის მეგობრის ჩვენება, რომელიც წვეულებაზე არ იმყოფებოდა, თუმცა 19 ივნისს დილიდან ეძებდა დაკარგულ შაქარაშვილს.

როგორც ერთ-ერთი მეგობრის, ოლეგ ბობოხიძის ჩვენებიდან ირკვევა, მას გიორგის გაუჩინარების შესახებ გურამ ამირხანაშვილმა უამბო. ვინაიდან შაქარაშვილი დილით არ გამოჩნდა, მეგობრები და მისი მშობლები მცხეთაში ჩავიდნენ.

„2020 წლის 19 ივნისს, დაახლოებით ღამის ორ საათზე გურამ ამირხანაშვილმა მომწერა და მითხრა, რომ წვეულებაზე მოხდა დაპირისპირება, თუმცა მასში გიორგი შაქარაშვილი და გურამ ამირხანაშვილი არ მონაწილეობდნენ. გურამი მომიყვა, რომ ვერ დაინახა, სად წავიდა გიორგი - რადგან გიორგი არ გამოჩნდა დილით 08:30-მდე, ამირხანაშვილი დაუკავშირდა დედამისს და აცნობა მომხდარის შესახებ.

მე, დედაჩემი, გიორგის დედა, და, გურამ ამირხანაშვილი და გიორგის მეზობელი წავედით მცხეთის მიმართულებით გიორგის მოსაძებნად. მივედით აგარაკზე და იქ, სადაც გაიქცა გიორგი. ჩვენ მდინარის ნაპირზე მისასვლელ ბილიკზე არ ჩავსულვართ", - ამბობს ოლეგ ბობოხიძე.