საქართველოს პრეზიდენტის ადმინისტრაცია სახალხო დამცველს აკრიტიკებს და აცხადებს, რომ ის არასოდეს რეაგირებს პრეზიდენტის წინააღმდეგ გაკეთებულ შეურაცხმყოფელ განცხადებებზე.

ადმინისტრაცია სახალხო დამცველს "პრეზიდენტის არასწორად ინტერპრეტირებული განცხადების" შეფასების გამოც საყვედურობს.

"საქართველოს სახალხო დამცველის მოვალეობა საქართველოში თითოეული ადამიანის უფლებებისა და თავისუფლებების დაცვის ზედამხედველობაა.

თუმცა, საარჩევნო კამპანიის პერიოდში, ომბუდსმენმა თავი აარიდა რეაგირებას ქალი კანდიდატის მიმართ გაკეთებულ შეურაცხმყოფელ განცხადებებზე და თუნდაც მისი შვილების მიმართ განხორციელებულ მუქარაზე, რომელიც შემდგომში სასამართლოს მიერ დადასტურდა.

აგრეთვე სახალო დამცველი არასოდეს რეაგირებს პრეზიდენტის წინააღმდეგ გაკეთებულ შეურაცხმყოფელ განცხადებებზე, მაშინ როცა ის სხვა პოლიტიკოსი ქალებისა და აგრეთვე მის მიმართ განხორციელებულ შეტევებს პასუხობს.

მეტად სამწუხაროა, ამ პირობებიდან გამომდინარე, რომ ომბუდსმენმა ჩათვალა საჭიროდ პრეზიდენტის 16 ივლისის განცხადების შეფასება მისი არასწორი ინტერპრეტაციის საფუძველზე.

არა მხოლოდ ზემოხსენებული განცხადება, არამედ საქართველოს პრეზიდენტის ყველა გამოსვლა გმობს ძალადობას და პოლარიზაციას და მიმართულია შერიგებისა და ერთიანობისკენ. მოცემული განცხადება ახალგაზრდებს მოუწოდებს არა ძალადობისკენ, არამედ აღიარებასა და მონანიებისკენ.

საქართველოს პრეზიდენტი, როგორც კონსტიტუციის და შესაბამისად, ადამიანის უფლებებისა და თავისუფლებების დაცვის გარანტი, იმედოვნებს, რომ სახალხო დამცველის ჩართულობა და გიორგი შაქარაშვილის გარდაცვალების გამოძიების პროცესზე ზედამხედველობა ხელს შეუწყობს ამ საქმის სრულყოფილ გამოძიებას, დაიცავს ოჯახს ბულინგისგან და საზოგადოებას დაძაბულობისგან და რაც მთავარია, უზრუნველყოფს უდანაშაულობის პრეზუმციის დაცვას", - აღნიშნულია განცხადებაში.

პრეზიდენტის ადმინისტრაცია არასწორად ინტერპრეტირებულ განცხადებაში გულისხმობს სალომე ზურაბიშვილის კომენტარს, რომელიც მან გიორგი შაქარაშვილის საქმესთან დაკავშირებით გააკეთა. "მე ვაჟკაცობა ვიცი ერთი-ერთზე, არ ვიცი მე ეს ჯგუფური ძალადობა", - აღნიშნა ზურაბიშვილმა საკითხზე კომენტირებისას.

პრეზიდენტის ამ კომენტარს გამოეხმაურა სახალხო დამცველი, რომელმაც აღნიშნა, რომ დაუშვებელია ძალადობის რომანტიზება.