თბილისის საკრებულოს სახელდების და სიმბოლიკის კომისიის ინიციატივით, ნაძალადევის რაიონში, ცოტნე დადიანის ქუჩაზე არსებულ სკვერს საქართველოს ტერიტორიული მთლიანობისთვის დაღუპული ძმების ვასიკო და ნუკრი წიკლაურების სახელი მიენიჭა. სკვერში შესაბამისი აბრა დამონტაჟდა. ღონისძიებას დაღუპული ძმების დედა ესწრებოდა.

ძმები წიკლაურები 1993 წლის 22 სექტემბერს ბაბუშერას აეროპორტში მომხდარ ტრაგედიას ემსხვერპლნენ.

დღეს სახელდების და სიმბოლიკის კომისიის ინიციატივით, ნაძალადევის რაიონში ძმები წიკლაურების სახელობის სკვერი გაიხსნა. ძმები წიკლაურები აფხაზეთის ომის გმირები არიან, რომლებიც ბაბუშერაში დაიღუპნენ. ბაბუშერაში დატრიალებული ტრაგედიიდან 27 წელი გავიდა. თბილისის საკრებულოს სახელდების და სიმბოლიკის კომისია მოხარულია, რომ ჩვენი დედაქალაქის სხვადასხვა უბნებში ასეთი გმირების სახელების უკვდავყოფის მონაწილეა.

დარწმუნებულები ვართ, რომ ეს არის ჩვენი მხრიდან ის სწორი ნაბიჯი, რომლითაც ჩვენ იმათ სულებს უკვდავყოფთ, ვინც თავი შესწირა ჩვენი ქვეყნის დამოუკიდებლობას, ერთიანობას და თავისუფლებას.

როგორც ვეტერანების საქმეთა სამსახურის ხელმძღვანელმა ვლადიმერ იმნაძემ განაცხადა,მნიშვნელოვანია იმ გმირების სახელების გავაცნოთ საზოგადოებას, ვინც საქართველოს ტერიტორიულ მთლიანობას შესწირა თავი. მან თბილისის საკრებულოს სახელდების და სიმბოლიკის კომისიას სკვერის სახელდებისთვის მადლობა გადაუხადა.

ღონისძიებაზე სიტყვით გამოვიდნენ ომში დაღუპული ძმების თანამებრძოლები, აფხაზეთის ომის ვეტერანები.

სკვერის გახსნას თბილისის საკრებულოს ნაძალადევის რაიონის მაჟორიტარი წევრები, პარლამენტის მაჟორიტარი დეპუტატი, დაღუპული გმირების ოჯახის წევრები და აფხაზეთის ომების ვეტერანები დაესწრნენ.