სვანეთში დაკარგულ 12 წლის ილია ფილფანს ინტერპოლი ყვითელი ცირკულარით ეძებს. შესაბამისი ინფორმაცია ინტერპოლის ოფიციალურ ვებგვერდზეა განთავსებული.

მესტიის მუნიციპალიტეტის სოფელ ლენჯერში 12 წლის ილია ფილფანი სახლიდან 18 ივლისს, ველოსიპედით გავიდა და მას შემდეგ უკან აღარ დაბრუნებულა.

მოზარდის გაუჩინარებასთან დაკავშირებით, სამეგრელო-ზემო სვანეთის პოლიციის დეპარტამენტის მესტიის რაიონულ სამმართველოში შეტყობინების მიღებისთანავე გამოძიება დაიწყო საქართველოს სისხლის სამართლის კოდექსის 143-ე მუხლის მე-3 ნაწილის „დ“ ქვეპუნქტით, რაც არასრულწლოვნის მიმართ წინასწარი შეცნობით თავისუფლების უკანონო აღკვეთას გულისხმობს.

ყვითელი ცირკულარი გულისხმობს დაკარგულ პირთა (ძირითადად, არსრულწლოვანთა) ადგილმდებარეობის დადგენას ან იმ პირთა იდენტიფიკაციას, რომლებიც თავად ვერ ახერხებენ საკუთარი პიროვნების იდენტიფიკაციას.