უნდა დაერეკა და ეკითხა, რა მდგომარეობაა, - განაცხადა საგარეო საქმეთა მინისტრმა დავით ზალკალიანმა დანიაში საქართველოს ელჩის, გიგი გიგიაძის განცხადებაზე, რომელიც ეხება დავით გარეჯის საკითხზე ივერი მელაშვილის დაკავებას.

როგორც ზალკალიანმა აღნიშნა, გიგი გიგიაძის განცხადება მისთვისაც მოულოდნელი იყო, რადგან მას სამინისტროსთან კომუნიკაცია არ ჰქონია.

„რაც შეეხება ელჩის მხრიდან გამოხმაურებას, მეც გამიკვირდა, რადგან კოლეგიალურობიდან და ელჩის პოზიციიდან გამომდინარე, როდესაც ელჩი განცხადებას აკეთებს, მით უმეტეს ასეთ უაღრესად მგრძნობიარე თემაზე, მას უნდა დაერეკა, ეკითხა ჩვენთვის, რა მდგომარეობაა, რასთან გვაქვს საქმე. ასეთი ზარი არ შემოსულა. ჩემთვისაც სიურპრიზი იყო. მან ასეთი განცხადება „ფეისბუქ“ პოსტის სახით გამოაქვეყნა და ალბათ, მისი ერთგვარი ემოციური დამოკიდებულება იყო კოლეგის მიმართ.

რა თქმა უნდა, მასთან აუცილებლად გვექნება კომუნიკაცია. მას მიეწოდება ყველა ინფორმაცია, იგივე გამოძიების პროცესში, რაც კი საზოგადოებისთვის ცნობილია, ყველა ინფორმაცია მისთვისაც ხელმისაწვდომი იქნება. ჩვენ ამას სამინისტროს შიგნით განვიხილავთ და მასთან ამ თემაზე საუბარი გვექნება“, – განაცხადა დავით ზალკალიანმა.

დანიაში საქართველოს ელჩი გიგი გიგიაძე დავით გარეჯის საქმეზე დაკავებულ, საქართველო – აზერბაიჯანის დელიმიტაცია – დემარკაციის კომისიის ყოფილ წევრს, ივერი მელაშვილს მხარდაჭერას უცხადებს.