საგარეო საქმეთა სამინისტროს ყველა მოქმედმა და ყოფილმა თანამშრომელმა იცის, რა ადამიანი, პატრიოტი და სპეციალისტია ივერი მელაშვილი, - ამის შესახებ „ნაციონალური მოძრაობის“ თავმჯდომარემ, გრიგოლ ვაშაძემ დავით გარეჯის საკითხზე მიმდინარე გამოძიებასთან დაკავშირებით განაცხადა.

„რაც შეეხება ამ ისტორიას, რომელსაც დავით გარეჯის ისტორია დაერქვა, ეს დავით გარეჯის ისტორია კი არა, წინასაარჩევნო პროვოკაციის ისტორიაა, ისევე როგორც საბურავების დაწვა, ისევე როგორც ის საცოდავი ექსპერტი ჟვანიას საქმეზე, რომელიც ვითომდა საფერფლით მოკლეს, ციხეში ჰყავდათ, აღარ მახსოვს, რამდენი ხანი.

ზუსტად ამიტომ პატრიოტი, ენციკლოპედიურ ცოდნის, უგანათლებულესი, უზარმაზარი ინსტიტუციური მეხსიერების პატრონი ივერი მელაშვილი ამ ნაძირლებმა საპყრობილეში ყოფნისთვის გაწირეს. ივერი მელაშვილი გამოვა საპყრობილედან, აუცილებლად შეიქმნება საგამოძიებო კომისია და ამ პროვოკაციის ავტორები აუცილებლად ჩასხდებიან იმ საკანში, სადაც ივერი მელაშვილია. არ მოვეშვები ამ საქმეს, ყველამ რომ თავი დაანებოს, მე არ მოვეშვები იმიტომ, რომ საგარეო საქმეთა სამინისტროს ყველა მოქმედმა და ყოფილმა თანამშრომელმა იცის, რა ადამიანი, პატრიოტი და სპეციალისტია ივერი მელაშვილი. ჩვენი პარტნიორები სასაზღვრო კომისიებიდან მეხვეწებოდნენ ივერი მელაშვილის კომისიიდან გაყვანას, ვციტირებ „მისი უკიდურესად ხისტი პოზიციების გამო“. კბილებით იცავდა ადამიანი საქართველოს საზღვრებს“, – განაცხადა გრიგოლ ვაშაძემ.

თბილისის საქალაქო სასამართლომ საქართველო-აზერბაიჯანის დემარკაციის კომისიის ექსპერტთა საბჭოს ხელმძღვანელ, ივერი მელაშვილისა და კომისიის წევრს, ნატალია ილიჩოვას აღკვეთის სახით 2-თვიანი წინასწარი პატიმრობა შეუფარდა. გადაწყვეტილება თბილისის საქალაქო სასამართლოს მოსამართლემ დავით კურტანიძემ გამოაცხად

ბრალდება მათ საქართველოს საწინააღმდეგო მოქმედებას ედავება. პროკურატურა ამტკიცებს, რომ დაკავებულებმა საზღვარი ჩვენი ქვეყნის საზიანოდ მონიშნეს და "საქართველოს ტერიტორიის ნაწილი უცხო ქვეყანას გადასცეს".

დაკავებულები ბრალს არ აღიარებენ.