საქართველოს საგარეო საქმეთა მინისტრის პირველი მოადგილე დავით ზალკალიანი შეხვდა აშშ-ის სენატის საგარეო ურთიერთობათა კომიტეტის მრჩევლებს ბენ პერსერს და ჯონ რეიდერს.

შეხვედრისას მხარეებმა განიხილეს ორ ქვეყანას შორის არსებული სტრატეგიული პარტნიორობის ფარგლებში მიმდინარე თანამშრომლობა. პოზიტიურად შეფასდა 2015 წელს საქართველო-აშშ-ის სტრატეგიული პარტნიორობის ქარტიის კომისიის ფარგლებში ოთხივე ძირითადი მიმართულებით ჩატარებული სამუშაო და იმედი გამოითქვა, რომ წელს კვლავ გაგრძელდება ქარტიის კომისიის ფარგლებში ასეთივე ნაყოფიერი თანამშრომლობა. შეხვედრისას განსაკუთრებული ყურადღება დაეთმო აშშ-ის კონგრესთან თანამშრომლობის შემდგომი განმტკიცების საკითხებს.

მხარეებმა ასევე მიმოიხილეს საქართველოსა და რეგიონში არსებული უსაფრთხოების გარემო და გამოწვევები, მათ შორის საქართველოს ოკუპირებულ ტერიტორიებზე ამჟამინდელი ვითარება. შეხვედრაზე ყურადღება გამახვილდა საქართველოს ევროპული და ევროატლანტიკური ინტეგრაციის პროცესში არსებულ გამოწვევებსა და მიღწეულ შედეგებზე. ამ თვალსაზრისით აღინიშნა აშშ-ის, როგორც საქართველოს სტრატეგიული პარტნიორის მხარდაჭერის როლი და მნიშვნელობა.

შეხვედრისას მხარეებმა ხაზგასმით აღნიშნეს სტრატეგიული პარტნიორობის ყველა მნიშვნელოვანი მიმართულებით ორმხრივი თანამშრომლობის გაღრმავების მიზანშეწონილობა. აშშ-ის მხარემ კიდევ ერთხელ დაადასტურა ურყევი მხარდაჭერა საქართველოს ტერიტორიული მთლიანობისა და სუვერენიტეტის, ევროპული და ევროატლანტიკური ინტეგრაციის, დემოკრატიული რეფორმების და ეკონომიკური განვითარების მიმართ.