გავრცელებული ინფორმაციით, თავდამსხმელმა სამივე მძევალი, მათ შორის, სამეგრელო - ზემო სვანეთის სამხარეო პოლიციის უფროსი ავთანდილ გადლავა გაათავისუფლა, თავად კი გაიქცა. მისი ადგილსამყოფელი უცნობია.

თავდამსხმელს პოლიციის მანქანაში მძევლად სამი პირი ჰყავდა აყვანილი, ხელში გახსნილი ხელყუმბარა ეჭირა, თან კი საინკასაციო მანქანით მიტანილი ფული მიჰქონდა.

შეიარაღებული თავდამსხმელი ზუგდიდში, საქართველოს ბანკის ფილიალში 21 ოქტომბერს, 14:27 სთ-ზე, რამდენიმე გასროლის შემდეგ შეიჭრა. თავდაპირველი ინფორმაციით, მან მძევლად 19 პირი აიყვანა, თუმცა მოგვიანებით შსს-მ განცხადებაში აღნიშნა, რომ მძევლად 43 მოქალაქე იყო აყვანილი.

მანამდე თავდამსხმელმა რამდენიმე მძევალი გაათავისუფლა და ხელისუფლებას ულტიმატუმი წაუყენა, მან 500.000 დოლარი, მანქანა ან ვერტმფრენი და პერიმეტრიდან სპეცრაზმის გაყვანა მოითხოვა. მასთან მოსალაპარაკებლად მოგვიანებით, სამხარეო პოლიციის უფროსი შევიდა, რომელიც მძევლებს, სავარაუდოდ, მისივე სურვილით ჩაენაცვლა.

ამ დრომდე არსებული ინფორმაციით, სამართალდამცველებმა თავდამსხმელის დაკავება ჯერ ვერ მოახერხეს.