თამარ ჟვანიას გადადგომა, ხელახალი არჩევნები, პოლიტპატიმრების გათავისუფლება - პარლამენტის წინ მიმდინარე საპროტესტო აქციაზე ოპოზიციურმა პარტიებმა ხელისუფლებას 3 ძირითად მოთხოვნა წაუყენეს.

ოპოზიციური პარტიების ერთობლივი მიმართვა საზოგადოებას ელენე ხოშტარიამ გააცნო.

"ჩვენ, ოპოზიციური ძალები მივიჩნევთ, რომ ეს პარლამენტი არ არის ლეგიტიმური, რადგან ის არ ასახავს ხალხის ნებას. ამიტომ, ჩვენ უარს ვამბობთ საპარლამენტო მანდატებზე. ეს პოზიცია სრულად გაიზიარა ყველა პოლიტიკურმა პარტიამ, რომელიც შევიდა და ვერ შევიდა გაყალბებული ციფრებით პარლამენტში. დაფიქსირდა უპრეცედენტო ოპოზიციური ერთიანობა.

აქ შეკრებილი ადამიანები ვითხოვთ – ხელახალ, თავისუფალ და სამართლიან არჩევნებს. ეს არჩევნები ვერ იქნება მიახლოებულიც კი თავისუფალთან, თუ არ შესრულდება მეორე მოთხოვნა. თამარ ჟვანია უნდა გადადგეს. კომისიები უნდა დაკომპლექტდეს სამართლიანი წესით. და ბოლოს, ყველა პოლიტპატიმარი უნდა იყოს გამოშვებული. წამზომი ჩართულია და ივანიშვილს დრო აქვს 20:00 საათამდე, რომ გამოვიდეს და ჩვენს პარტნიორებთან ერთად ამ საკითხებზე ელაპარაკოს ხალხს, დაჯდეს მოლაპარაკებების მაგიდასთან და გადაწყვიტოს, რა უნდა, წავა თავისთვის, თუ მაინც მოუწევს წასვლა, რადგან ამ ძალას ვერავინ დაუპირისპირდება. ეს არის მოთხოვნები და წამზომი ჩართულია", - განაცხადა ელენე ხოშტარიამ.