არაღიარებული მთიანი ყარაბაღის ე.წ. პრეზიდენტის პრესსპიკერმა ვაგრამ პოღოსიანმა განაცხადა, რომ აზერბაიჯანელი სამხედროები სტეპანაკერტის მისადგომებთან იმყოფებიან.

 „მტერი სტეპანაკერტის მისადგომებთან იმყოფება და დედაქალაქის არსებობა უკვე საფრთხეშია. თუ გვსურს, რომ შუშა კვლავ ჩვენი გახდეს, შევინარჩუნოთ არცახი (ყარაბაღის სომხური სახელწოდება) უნდა ვიღონოთ ყველანაირი ძალა სტეპანაკერტისა და ფრონტის ხაზის სხვა მიმართულებების დასაცავად“, - წერს პოღოსიანი ფეისბუქზე.

აზერბაიჯანის პრეზიდენტმა ილჰამ ალიევმა გუშინ შუშისა და მთიანი ყარაბაღის სხვა ოცზე მეტი დასახლებული პუნქტის გათავისუფლების შესახებ განაცხადა. მისი თქმით, საომარი მოქმედებების დაწყებიდან აზერბაიჯანის არმიამ დაიკავა 200-ზე მეტი დასახლებული პუნქტი მთიან ყარაბაღში.

სომხეთის თავდაცვის სამინისტრომ უარყო შუშის საბრძოლო მოქმედებების დასრულება. უწყების მტკიცებით, აზერბაიჯანელი სამხედროების იერიშები მოიგერიეს მარტუნის, მარტაკერტისა და ტაგავარდის მიმართულებითაც.