დავით ჯალაღანია საქართველოში ჩინეთის ელჩს შეხვდა
2016 წლის 21 იანვარს, საქართველოს საგარეო საქმეთა მინისტრის მოადგილემ, დავით ჯალაღანიამ გამართა შეხვედრა საქართველოში ახლადდანიშნულ ჩინეთის სახალხო რესპუბლიკის საგანგებო და სრულუფლებიან ელჩთან, ძი იანჩისთან.
შეხვედრის დროს მხარეებმა განიხილეს ორმხრივი და მრავალმხრივი ურთიერთობების დღის წესრიგის მიმდინარე საკითხები, მათ შორის ქვეყნებს შორის გააქტიურებული თანამშრომლობა მრავალი მიმართულებით. ხაზი გაესვა, "ახალი აბრეშუმის გზის", როგორც ევროპისა და აზიის დამაკავშირებელი სახმელეთო მარშრუტის როლს და ხსენებულ პროექტში ორმხრივი თანამშრომლობის კიდევ უფრო გაღრმავების მნიშვნელობას.
დავით ჯალაღანიამ მიულოცა ელჩს მისიის დაწყება საქართველოში და წარმატება უსურვა მომავალ საქმიანობაში. თავის მხრივ, ჩინეთის ელჩმა გამოხატა მზადყოფნა ინტენსიური ორმხრივი ურთიერთობების განვითარებისთვის. ელჩმა დაადასტურა ჩინეთის სახალხო რესპუბლიკის ურყევი მხარდაჭერა საქართველოს სუვერენიტეტისა და ტერიტორიული მთლიანობის მიმართ.
მხარეები შეთანხმდნენ მჭიდრო თანამშრომლობაზე.
