საქართველოს პარლამენტმა, მესამე მოსმენით, "ამნისტიის შესახებ" კანონპროექტი დაამტკიცა. აღნიშნულ ინიციატივას მხარი 83 დეპუტატმა დაუჭირა და მის წინააღმდეგ ხმა არავის მიუცია.

ამნისტიის კანონით ერთჯერადი, დროებითი და განსაკუთრებული ღონისძიების სახით, საზოგადოებრივი საშიშროების ხარისხის გათვალისწინებით, სისხლისსამართლებრივი პასუხისმგებლობისა და სასჯელისაგან თავისუფლდებიან საქართველოს სისხლის სამართლის კოდექსით გათვალისწინებული ზოგიერთი დანაშაულისათვის ბრალდებული და მსჯავრდებული პირები, რომლებმაც დანაშაული 2020 წლის 11 დეკემბრამდე ჩაიდინეს.

ამასთან საქართველოს სისხლის სამართლის კოდექსის 260-ე მუხლით გათვალისწინებული დანაშაულის ჩადენისათვის მსჯავრდებულ პირებს, რომლებსაც შეფარდებული აქვთ უვადო თავისუფლების აღკვეთა, სასჯელის სახე გარდაექმნებათ ვადიან თავისუფლების აღკვეთად (20 წლით).

კანონი გამოქვეყნებისთანავე ამოქმედდება, მისი აღსრულება კი ერთი თვის ვადაში უნდა მოხდეს. აქტი 80-მდე მუხლს შეეხება და 1 500-მდე მსჯავრდებულზე გავრცელდება.

ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, მიხეილ სარჯველაძემ პარლამენტის ბიუროს დღევანდელ სხდომაზე ამნისტიის კანონპროექტთან დაკავშირებით განმარტება გააკეთა:

"იმ სახით, როგორც მეორე მოსმენის შემდეგ საბოლოო ჯამში ჩამოყალიბდა ამნისტია, გაიზარდა პირთა წრე, რომელთაც ეს ამნისტია სხვადასხვა ფორმით შეეხება, მათ შორის, სავარაუდოდ პატიმართა რიცხვი გადააჭარბებს 1500-ს, თითქმის 10 ათასამდე გაიზრდება იმ ადამიანთა რიცხვი, ვინც პრობაციის რეჟიმში მიიღებენ შეღავათს. რაც შეეხება 2012 წლის 1 ოქტომბრამდე დაკისრებულ სისხლის სამართლის ჯარიმებს, ამასთან მიმართებაში 4 ათასს გადააჭარბებს ადამიანთა რიცხვი, ვისაც ამნისტია შეეხება. ასეთია მოსალოდნელი სტატისტიკა".