ამერიკელი ფედერალური პროკურორები აცხადებენ, რომ ვაშინგტონში კონგრესის შენობაში შეჭრილი დემონსტრანტების მიზანს კონგრესმენების მოკვლა წარმოადგენდა. ინფორმაციას AP ავრცელებს.

კერძოდ, ამის შესახებ ნათქვამია არიზონას პროკურორის შუამდგომლობაში, ამავე შტატის მცხოვრების ჯეიკობ ჩენსლის საქმესთან დაკავშირებით.

 „მყარი მტკიცებულებები, მათ შორის კაპიტოლიუმში ჩენსლის სიტყვები და ქმედებები, ადასტურებს, რომ არეულობების მონაწილეთა განზრახვა მდგომარეობდა იმაში,რომ აეყვანათ და მოეკლათ შეერთებული შტატების მთავრობის თანამდებობის პირები“, - ნათქვამია დოკუმენტში.

ამის გარდა, პროკურორის თქმით, ჩენსლიმ სხდომათა დარბაზში დატოვა მუქარის წერილი ვიცე პრეზიდენტ მაიკ პენსის მისამართით. წერილში ეწერა: „ეს მხოლოდ დროის საკითხია, სამართლიანობა დგება“.

თუმცა, მოგვიანებით, კოლუმბიის ოლქის პროკურორის მოვალეობის შემსრულებელმა მაიკლ შერვინმა განაცხადა, რომ პირდაპირი მტკიცებულებები იმისა, რომ კაპიტოლიუმის შტურმის მონაწილეები კონგრესმენების აყვანასა მოკვლას გეგმავდნენ, არ არსებობს. შერვინის თქმით, გამოძიება დედაქალაქის ოლქის ფარგლებს გასცდა და შტურმის მონაწილეები მთელი ქვეყნის მასშტაბით იკითხებიან, ამიტომ შესაძლოა, საწინააღმდგო მონაცემებიც შეგროვდეს.

მოქმედი პრეზიდენტის დონალდ ტრამპის მხარდამჭერები კაპიტოლიუმში 6 იანვარს იმ დროს შეიჭრნენ, როდესაც სენატორები და კონგრესმენები საპრეზიდენტო არჩევნების შედეგების დასამტკიცებლად იყვნენ შეკრებილნი. შტურმის გამო სხდომა რამდენიმე საათით შეწყდა.

იმ დღს დაიღუპა ხუთი ადამიანი, მათ შორის შტურმის ერთი-ერთი მონაწილე ქალი პოლიციელის მხრიდან სროლის შედეგად დააიღუპა, კაპიტოლიუმის დაცვის ერთ-ერთმა წევრმა მძიმე ჭრილობები მიიღო და საავადმყოფოში გარდაიცვალა.  

ამის შემდეგ სამართალდამცველებმა შტურმის მონაწილეებისგან შენობა გაათავისუფლეს, კონგრესმა სხდომა განაახლა და ახალ პრეზიდენტად ჯო ბაიდენი დაამტკიცა.

დემოკრატებმა ტრამპი ამბოხისკენ წაქეზებაში დაადანაშაულეს, წარმომადგენელთა პალატამ კი მას იმპიჩმენტი გამოუცხადა.