გიორგი გაბუნია დღეს მოსამართლის თანდასწრებით დაიკითხა. საქმე უკავშირდება შეკვეთილი მკვლელობის მომზადების საქმეს, რომელშიც დაზარალებულის სტატუსი ჟურნალისტს აქვს. სასამართლო პროცესს დღეს თავად ბრალდებული ვასმბეგ ბოკოვიც დაესწრო.

გიორგი გაბუნიამ თქვა, რომ, შესაძლოა, მან დღეს თავის პოტენციურ მკვლელს ჩახედა თვალებში.

"ვერ ვიტყვი, ინფორმაციას აგროვებდა, მკვლელობას ამზადებდა თუ რა როლი ჰქონდა, მაგრამ ასე, ვიზუალურად რომ შეხედავ, ჰგავს. შესაძლოა, ეს იყოს ის, ქილერი, რომელსაც ჩემი ლიკვიდაცია უნდა მოეხდინა და მით უმეტეს, ამას მხოლოდ ვიზუალური მხარიდან გამომდინარე არ ვამბობ, ინფორმაციის მიხედვით,რომელიც მე სუსმა მომაწოდა, როდესაც დაზარალებულად მცნეს, მას აქვს გავლილი შესაბამისი ფიზიკური მომზადება, აქვს კრიმინალური წარსული, იძებნებოდა სხვადასხვა ქვეყანაში მკვლელობის საქმეებისთვის და ასე რომ, არ გამოვრიცხავ, დღეს მე ჩემს პოტენციურ მკვლელს ჩავხედე თვალებში", - თქვა გიორგი გაბუნიამ.

მისივე თქმით, არ აქვს მოლოდინი, რომ საფრთხემ გადაიარა, მით უმეტეს, რომ დაკვეთა პუტინისგან მოდის.

"როდესაც დამკვეთი არის პუტინი, რა თქმა უნდა, ეს ასე არ სრულდება და მე არ მაქვს იმის ილუზია და მოლოდინი, რომ ამ ერთი ადამიანის დაკავებით რუსეთის პრეზიდენტის შურისძიების სურვილი დასრულდა, - დაამატა გიორგი გაბუნიამ.

გაბუნია ამბობს, რომ მისი ერთადერთი მტერები, შესაძლოა იყვნენ პუტინი და კადიროვი, რადგან კრიტიკული გამოსვლების მიუხედავად, მას მტრები არ ჰყავს.

"სასამართლოზეც ვთქვი, მიუხედავად ჩემი კრიტიკული გამოსვლებისა, ვთვლი, რომ არც საქართველოში არ მყავს იმ დონის მტერი, რომ ჩემი მოკვლა გადაწყიტონ და მითუმეტეს, საზღვარგარეთ, ერთადერთი, ვინც ეს შეიძლება იყოს, პუტინი და მისი საყვარელი კადიროვია“, - განაცხადა გაბუნიამ.