1-ელი თებერვლიდან რეგულარული რეისების აღდგენასთან ერთად, მარტივდება საქართველოში შემოსვლის რეჟიმიც.

ეკონომიკისა და მდგრადი განვითარების მინისტრის განმარტებით, საქართველოს მოქალაქეებს ახალი რეგულაციების მიხედვით, არჩევანის საშუალება ექნებათ. უფრო კონკრეტულად საქართველოს მოქალაქეს საკუთარი სურვილის მიხედვით შეუძლია წარმოადგინოს PCR-ის ტესტის პასუხი “ნეგატიური” და გადავიდნეს 8-დღიან თვითიზოლაციაში, ან თვითიზოლაციის ნაცვლად, საქართველოში შემოსვლიდან მესამე დღესაც ჩაიტაროს PCR ტესტი.

რაც შეეხება საქართველოს მოქალაქეებს, ვისაც არ ექნება PCR- ტესტის “ნეგატიური” პასუხი, მათთვის 12-დღიანი თვითიზოლაციის ნაცვლად 8 დღე წესდება.

ხოლო პირი, რომელსაც ნებისმიერი ტიპის კოვიდ ვაქცინის სრული კურსი აქვს ჩატარებული და ამის დამადასტურებელი მოწმობაც აქვს, საქართველოს საზღვარზე დაუბრკოლებლად შემოვლენ.

"რაც შეეხება უცხო ქვეყნის ვიზიტორებს, რაც ჩვენი ტურისტული ინდუსტრიის მნიშვნელოვანი ნაწილია. ნებისმიერი ტიპის კოვიდვაქცინის სრული კურსის ჩატარების დამადასტურებელი დოკუმენტის საზღვარზე წარდგენით, ყველა ქვეყნის მოქალაქეს უპირობოდ, საქართველოში შემოსვლა შეეძლება.

ვითვალისწინებთ იმას, რომ ვაქცინირებული ადამიანების რაოდენობა მსოფლიოში იზრდება და ეს არის ჩვენი პირველი მთავარი სამიზნე ჯგუფი თუნდაც მწვანე აჭარაში ჩასაყვანად. რაც შეეხება არავაქცინირებულ ვიზიტორებს: ევროკავშირის, ისრაელის, შვეიცარიის, ამერიკის შეერთებული შტატების, საუდის არაბეთის, არაბთა გაერთიანებული საემიროების, ბაჰრეინის მოქალაქეებსა და რეზიდენტებს ამავე ქვეყნებიდან და ტრანზიტულად ვინც შემოდის საქართველოში, ექნებათ შესაძლებლობა, რომ ქვეყანაში შემოვიდნენ ბოლო 72 საათში გაკეთებული PCR ტესტის ნეგატიური პასუხით და ქვეყანაში შემოსვლის შემდეგ მე-3 დღეს ჩაიტარონ PCR ტესტი", - განაცხადა თურნავამ.