თბილისში, დედაენის ბაღში, დაუმორჩილებლობის აქციაზე დაწესებული შეზღუდვების დარღვევის გამო ერთი ადამიანი დააჯარიმეს. მას პოლიციამ 2000 ლარიანი ჯარიმა დააკისრა და ქვითარი გამოუწერა.

როგორც აქციის მონაწილეებმა თქვეს, ერთერთი მათგანი იმის გამო დააჯარიმეს, რომ დედაენის ბაღის ტერიტორია დატოვა და აფთიაქში წამლის საყიდლად გადავიდა მიმდებარე ქუჩაზე.

აქციის მიმდებარედ მობილიზებულმა პოლიციელებმა განაცხადეს, რომ დაჯარიმდება ყველა ის ადამიანი, ვინც კორონავირუსის გავრცელების გამო დაწესებულ შეზღუდვებს არ დაემორჩილება.

აქციის ორგანიზატორების თქმით, არსებული შეზღუდვები ადამიანებზე ზრუნვას არ ემსახურება. ისინი ითხოვენ, რომ ქვეყანა ყველა რეგულაციის დაცვით გაიხსნას.

მსვლელობაში პოლიტიკოსები, რესტორატორები, აქტივისტები და სხვადასხვა სექტორის წარმომადგენლები მონაწილეობდნენ.

ფოტო: მთავარი არხი