ახალქალაქის, კუმურდოს და კარის მიტროპოლიტი მეუფე ნიკოლოზი აცხადებს, რომ სინოდის სხდომაზე პატრიარქის გადაყენების საკითხი არ განიხილება. ამის შესახებ გადაცემა მან "დღის კურიერში" ისაუბრა.

"გამოცდილებით ვიცი, რომ რასაც წინასწარ ლაპარაკობენ, ის საკითხები არ არის ხოლმე განხილვის საგანი და სამ დღეში ყველა გავერკვევით მაგაში", - ამბობს მეუფე ნიკოლოზი.

მოტროპოლიტი ამბობს, რომ პატრიარქზე გავლენას ვერავინ მოახდენს და ხშირად სინოდის სხდომაზე ისიც შეწინააღმდეგებია პატრიარქს და კენჭისყრაზე მხარი არ დაუჭერია, თუმცა ეს დასაშვები ფაქტებია.

"ჩვენი პატრიარქი შორენა თეთრუაშვილი კი არ არის, ჩვენი პატრიარქი არის ილია მეორე და მინდა გითხრათ, ძალიან მტკიცე ნებელობის პიროვნებაა, ძალიან ბრძენია და ძალიან ღრმა აზროვნების ადამიანია, ვერავინ მოახდენს მასზე გავლენას, ვერც სტრუქტურა, ვერც ადამიანი და რასაც უნდა იმას აკეთებს, ერთპიროვნულად მართავს ეკლესიას სინოდიდან სინოდამდე, თორემ სინოდზე მეც კი გამიბედავს, შევწინააღმდეგებივარ, კენჭისყრაზე მხარი არ დამიჭერია, ეს დასაშვები ფაქტებია,"-განაცხადა მეუფე ნიკოლოზმა.