ვისურვებდი, რომ (სინოდის სხდომაზე) ყოფილიყო მოწოდება, რომ ვაქცინაციამ შეიძლება დაიცვას თქვენ მოყვასი, ესეც დიდი საქმე იქნებოდა, - ამის შესახებ ჯანდაცვის ექსპერტმა აკაკი ზოიძემ ფორმულას გადაცემა "კომენტარში" განაცხადა.

ზოიძის აზრით, სწორი განცხადებებით, საფუძველი გამოეცლება ექსტრემისტულად განწყობილ ადამიანებს, რომლებიც რელიგიის სახელით დეზინფორმაციას ავრცელებენ.

"რაც გავიგე სასულიერო პირების პირველი კომენტარები, რომ აქ იქნება ნების თავისუფლება, ეს უკვე წინ გადადგმული ნაბიჯია. ამითი საფუძველი ეცლება ექსტრემისტულად განწყობილ ადამიანებს, რომლებიც მართლმადიდებლობის და რელიგიის სახელით ავრცელებენ დეზინფორმაციას, შეთქმულების თეორიებს - ჩიპიზაციასთან, ანტიქრისტესთან დაკავშირებულს, 3 ექვსიანთან და ასე შემდეგ.

მოვისმინე სწორი პოზიციებიც, რომ უნდა ვკითხოთ ჯერ სპეციალისტებს, რომ ეს არის სამედიცინო ჯანდაცვის თემა და ამას მივესალმები. სინოდის განცხადებაც იქნება წინ გადადგმული ნაბიჯი. გასაგებია, რომ სინოდი ვერ დაავალდებულებს და ვერც მოუწოდებს დაბეჯითებით, მაგრამ ვისურვებდი, რომ ყოფილიყო მოწოდება, რომ ვაქცინაციამ შეიძლება დაიცვას თქვენ მოყვასი, ესეც დიდი საქმე იქნებოდა... ჩემთვის მთავარი მომენტი ის არის, რომ ბევრი რელიგიური მოსაზრებით, ბევრი ანტივაქსერი ჩამოვიშორეთ", - თქვა ზოიძემ.